ភ្នំពេញ: នៅថ្ងៃបោះឆ្នោត ទី២៨ ខែកក្កដា ឆ្នាំ២០១៣ សម្រាប់ការជ្រើសតាំងអ្នកតំណាងរាស្ត្រ នីតិកាលទី៥ ឆ្នាំ២០១៣នេះ ប្រជាពលរដ្ឋដែលមានឈ្មោះនៅក្នុងបញ្ជីឈ្មោះបោះឆ្នោត បានរូតរះតាំងពីព្រលឹម ទៅកាន់ការិយាល័យបោះឆ្នោត ដើម្បីបំពេញកាតព្វកិច្ចរបស់ខ្លួនជាពលរដ្ឋ និង ជាម្ចាស់ឆ្នោត ក្នុងការជ្រើសតាំងមេដឹកនាំដែលពួកខ្លួនពេញចិត្ត ស្របទៅតាមឆន្ទៈរបស់ខ្លួន។
នៅតាមដងផ្លូវមានសភាពស្ងប់ស្ងាត់ ដោយសារតែប្រជាពលរដ្ឋភាគច្រើនដែលមានបញ្ជីឈ្មោះ
បោះឆ្នោតនៅតាមបណ្តា ខេត្តនានា បានធ្វើដំណើរទៅបោះឆ្នោតតាំងពីរសៀល ថ្ងៃទី២៦ ខែកក្កដា ឆ្នាំ២០១៣ កន្លងទៅ សម្រាប់ត្រៀមបោះឆ្នោតជ្រើសរើសមេដឹកនាំរបស់ ខ្លួននៅថ្ងៃទី២៨ ខែកក្កដា ឆ្នាំ២០១៣នេះ។
ជាមួយគ្នានោះដែរនៅថ្ងៃទី២៨ ខែកក្កដា ឆ្នាំ២០១៣ នេះ សមត្ថកិច្ចនគរបាល ក៏ដូចជា កងរាជអាវុធហត្ថ ត្រូវបានដាក់ពង្រាយ ការពារសន្តិសុខ សុវត្ថិភាព នៅតាមមណ្ឌល និង ការិយាល័យបោះឆ្នោតទូទាំងប្រទេស។
លោក ម៉ាណា ប្រជាពលរដ្ឋរស់នៅក្នុងក្រុងភ្នំពេញ មាននិយាយថា “លោកបោះឆ្នោតនៅពេលនេះ គឺជាការប្រើប្រាស់នូវឆន្ទៈរបស់ខ្លួន ក្នុងការជ្រើសរើសមេដឹកនាំដែលលោកពេញចិត្ត”។ លោកបានបញ្ជាក់ថា ស្ថានភាពនៅថ្ងៃបោះឆ្នោតទី២៨ ខែកក្កដា នេះមានសភាពស្ងប់ស្ងាត់ល្អ ហើយពុំមានអសន្តិសុខកើតឡើងទេ។ “ប្រជាពលរដ្ឋមាននាំគ្នាទៅបោះឆ្នោតដោយគ្មានការព្រួយបារម្ភពី អសន្តិសុខកើតឡើងទេ”៕
