- Monday, 26 August 2013 17:53
- សុខ ធារ៉ា
លោក បូ ស៊ីឡៃ ត្រូវបានតុលាការចោទ ប្រកាន់ពីបទប្រព្រឹត្តអំពើពុករលួយតាមរយៈការទទួលសំណូកពីអ្នកជំនួញ ពីររូបដែលមានទំហំទឹកប្រាក់២លាន៦សែន៧ម៉ឺនអឺរ៉ូ និងបទរំលោភអំណាចក្នុងអំ ឡុងពេលលោកកាន់តំណែងជាប្រធានបក្សកុម្មុនីសចិននៅក្រុង Chongqing ដើម្បីទប់ស្កាត់ដំណើរការស៊ើបអង្កេត លើការធ្វើឃាតពាណិជ្ជករអង់ គ្លេសមួយរូប ដែលមានជាប់ពាក់ព័ន្ធនឹងភរិយាលោក។
ក្នុងសវនាការកាលពីថ្ងៃអាទិត្យម្សិលមិញ លោក បូ ស៊ីឡៃ បានបដិសេធជាថ្មីម្តងទៀតថា លោកមិនធ្វើដូចការចោទប្រកាន់របស់តុលាការឡើយ។ ដំណើរការកាត់ទោសសំណុំរឿង លោក បូ ស៊ីឡៃនេះ រដ្ឋាភិបាលចិនមិនអនុញ្ញាត ឲ្យសារព័ត៌មានអន្តរជាតិ ចូលទៅក្នុងបន្ទប់សវនាការដើម្បីយកព័ត៌មាននោះទេ។
សំណុំរឿងលោក បួ ស៊ីឡៃ ត្រូវប្រធានចៅក្រមនៃប្រទេសចិនបានប្រកាសថា គឺជាសំណុំរឿងដ៏ធំបំផុត និងចម្រូងចម្រាសខ្លាំងណាស់នៅក្នុងប្រទេសនេះ។ នៅពេលបញ្ចប់សវនាការនៅថ្ងៃចន្ទនេះ តុលាការបានប្រកាសថា ចំពោះរឿងក្តីរបស់លោក បូ ស៊ីឡៃនេះ តុលាការនឹងធ្វើការប្រកាសសាលក្រមនៅពេលក្រោយ ដោយមិនបានកំណត់កាលបរិច្ឆេទច្បាស់លាស់នោះទេ។
អស់រយៈពេលជាងមួយឆ្នាំហើយ ដែលលោក ប៉ូ ស៊ីឡៃ ស្ថិតនៅជាតួឯក នៃរឿងអាស្រូវដ៏ធំ ដែលធ្វើឲ្យកក្រើករញ្ជួយបក្សកុម្មុយនិស្តចិន។ រឿងអាស្រូវ ដែលផ្ទុះចេញដំបូងពីការសង្ស័យជុំវិញការធ្វើឃាតអ្នកជំនួញអង់គ្លេស បានធ្វើឲ្យមេដឹកនាំបក្សកុម្មុយនិស្តចិន ដែលធ្លាប់តែមានឥទ្ធិពលដ៏ខ្លាំងមួយនោះ ត្រូវខ្ទាតចេញពីជួរថ្នាក់ដឹកនាំកំពូលនៃបក្សកុម្មុយនិស្ត ចំណែកឯបក្សកុម្មុយនិស្តចិនត្រូវប្រឈមមុខនឹងវិបត្តិដ៏ធំមិនធ្លាប់ ជួប ក្នុងរយៈពេលពីរទសវត្សរ៍ចុងក្រោយនេះ។
ពាក់ព័ន្ធនឹងរឿងអាស្រូវនេះ មនុស្សពីរនាក់ត្រូវបានតុលាការចិនកាត់ឲ្យជាប់ទោសរួចទៅហើយ គឺភរិយារបស់លោកប៉ូ ស៊ីឡៃ និងអតីតមេប៉ូលិស ដែលជាអតីតកូនចៅរបស់ លោកប៉ូ ស៊ីឡៃ ក្នុងករណីសម្លាប់អ្នកជំនួញជនជាតិអង់គ្លេស។
សូមបញ្ជាក់ថា បច្ចុប្បន្នលោក ប៊ូ ស៊ីឡៃ មានអាយុ៦៤ ឆ្នាំ ជាកូនអ្នកបដិវត្តដំបូងម្នាក់របស់ចិន លោក ប៉ូស៊ីឡៃ ដែលមានប្រជាប្រិយភាពខ្លាំង នៅចុងឈីង បានបង្ហាញមហិច្ឆតា ចង់ក្តោបអំណាចថ្នាក់ជាតិ និងចង់ចូលជាសមាជិក គណៈកម្មាធិការអចិន្ត្រៃយ៍ការិយាល័យនយោបាយរបស់បក្សកុម្មុយនិស្តចិន ៕(ដោយៈ ជា ធារិទ្ធិ)
