អាយុប៉ុន្មានទើបច្បាប់ឈប់ឲ្យបើកបរ?
តាមដងផ្លូវមួយចំនួន គេតែសង្កេតឃើញមនុស្សចាស់នៅមានកម្លាំងជិះម៉ូតូបានដូចក្មេងៗ ប៉ុន្តែខ្លះទៀតជិះញ័រទទ្រើក និងខ្លះទៀតបង្កឲ្យមានករណីកកស្ទះ និងគ្រោះថ្នាក់ចរាចរណ៍ក៏មាន។
ខាងក្រោមនេះគឺជាមតិរបស់យុវវ័យ៤រូបដែលយល់ថា មនុស្សចាស់មិនគួរបើកបរម៉ូតូដោយខ្លួនឯងទេ ឯអ្នកខ្លះយល់ថាមិនជាបញ្ហាអ្វីទេ ឲ្យតែពួកគាត់នៅមានស្មារតីល្អ។
លោក ចាន់ វាសនា បុគ្គលិកអង្គការក្រៅរដ្ឋាភិបាលមួយបានប្រាប់ឲ្យដឹងថា រូបលោកធ្លាប់ឃើញមនុស្សចាស់អាយុប្រហែល៥០ប្លាយនៅជិះម៉ូតូបានដោយខ្លួនឯង ហើយមើលទៅញ័រៗ។
វាសនា បន្ថែមថា៖ “ពិបាកណាស់ពេលជិះម៉ូតូក្បែរពួកគាត់ ព្រោះគាត់ជិះមើលទៅញ័រៗ ខ្លាចតែជ្រុលមកប៉ះគ្នានឹងវីវរហ្មង!។ គាត់គួរតែឈប់ជិះម៉ូតូដោយខ្លួនឯងទៅ ព្រោះចាស់ហើយ។ ភ្នែកមើលមិនសូវចាស់ ស្មារតីក៏ភ្លេចភ្លាំងច្រើនគ្រោះថ្នាក់ណាស់។ បើគាត់ចង់ទៅណា គាត់គួរឲ្យគេជូនទៅប្រសើរជាង”។
រីឯយុវជន យ៉ន ពេជ្រ និសិ្សតឆ្នាំទី៤នៅវិទ្យាស្ថានភាសាបរទេស(IFL) បាននិយាយថា រូបគេក៏ធ្លាប់ឃើញមនុស្សចាស់ជិះម៉ូតូដោយខ្លួនឯងដែរ។ ពេជ្រ បន្ថែមថា៖ “គាត់មើលទៅខ្ទង់ប្រហែល៦០ឆ្នាំជាង។ ខ្ញុំភ័យជួសគាត់ ព្រោះគាត់ជិះត្រឹកៗវេៗ។ សម្រាប់ខ្មែរគេចាត់ទុកថា វ័យប៉ុណ្ណឹងគឺចាស់ហើយ ល្មមឈប់សម្រាកជិះម៉ូតូដោយខ្លួនឯងហើយ។ ម្យ៉ាងកាយសម្បទាក៏ទ្រុឌទ្រោម ស្មារតីក៏ទន់ខ្សោយងាយនឹងបង្កគ្រោះថ្នាក់ចរាចរណ៍ដល់អ្នកដទៃ និងខ្លួនឯងណាស់”។
ដោយឡែកកញ្ញា សុ ចាន់ណា គរុនិស្សិតនៅវិទ្យាស្ថានជាតិអប់រំបាននិយាយទាំងសុទិដ្ឋិនិយមថា ឲ្យតែមនុស្សចាស់នៅមានកម្លាំងពលំល្អមិនថាប្រុស ឬស្រីទេសុទ្ធតែអាចបើកបរបានដោយខ្លួនឯង។ “ពូខ្ញុំអាយុ៧០ឆ្នាំហើយ ម៉េចនៅជិះម៉ូតូបានខ្លួនឯងឡើងផឹល! មិនដែលមានបញ្ហាអីផង។ កម្លាំងគាត់នៅមាន ម្យ៉ាងគាត់ជិះយូរឆ្នាំមកហើយ គាត់នៅអាចដឹកឥវ៉ាន់ធ្ងន់បានទៀតផង”។
ចំពោះកញ្ញា ចរិយា បុគ្គលិកនៅធនាគារមួយបានប្រាប់ទាំងទឹកមុខញញឹមថា៖ “អ៊ំស្រីនៅក្បែរផ្ទះខ្ញុំអាយុប្រហែលជា៥៥ឆ្នាំនៅជិះកង់អាគុយទៅផ្សារបានរាល់តែព្រឹកហ្នឹង ហើយជិះលឿនទៀតផង។ និយាយទៅគាត់នៅមានសុខភាពល្អនៅមាំ តែបើមនុស្សចាស់ផ្សេងដែលមានស្មារតីខ្សោយប្រហែលជាមិនអាចជិះបានដល់វ័យប៉ុណ្ណឹងដូចគាត់ទេមើលទៅ”។
លោក គង់ គីម តំណាងសាលាបង្រៀនបើកបរដៃធំពីរ បានលើកឡើងថា តាមច្បាប់អាយុត្រឹម៦០ឆ្នាំគេកំណត់ឲ្យឈប់បើកបរហើយ ព្រោះច្បាប់បានគិតគូរពីសុវត្ថិភាពចរាចរណ៍ជាចម្បង។ ជាក់ស្ដែងយុវវ័យខ្លះពេលឃើញមនុស្សចាស់ជិះម៉ូតូតែឯង ពួកគេចូលចិត្តជិះជ្រែ ជិះលឿនៗឆាបពួកគាត់ ធ្វើឲ្យគាត់ភ្ញាក់ភ័យរេចង្កូត អាចបណ្ដាលឲ្យមានជាគ្រោះថ្នាក់ចរាចរណ៍ ហើយអាចនឹងបាត់បង់ជីវិតផងពេលខ្លះ។
ដោយឡែកលោក យក់ ផល្លា ជាមន្រ្តីនគរបាលមួយរូប មិនបានបញ្ជាក់លម្អិតពីច្បាប់ចរាចរណ៍ផ្លូវគោកមាត្រាប៉ុន្មានមានការហាមឃាត់នោះទេ។ លោកគ្រាន់តែលើកឡើងថា ជាទូទៅប័ណ្ណបើកបរ៥ឆ្នាំនឹងធ្វើម្តង។ មិនថាមនុស្សអាយុ៦០ទេ សំខាន់ឲ្យតែឆ្លងកាត់ការធ្វើតេស្តពិនិត្យលើសុខភាព និងកាយសម្បទាឃើញថារឹងមាំអាចគ្រប់គ្រងបញ្ជាយានយន្តបាន នោះពួកគាត់នឹងមានសិទ្ធទទួលបានប័ណ្ណបើកបរ។ ដូច្នេះពួកគាត់អាចបើកបរបានដោយស្របច្បាប់៕
អត្ថបទ៖ ផល្លា សុម៉ាលីណា
No comments:
Post a Comment