ដោយ៖ CEN/មុនីរាជ
Thursday 27 June 2013 - 9:47 am
ភ្នំពេញ: នៅថ្ងៃយុទ្ធនាការឃោសនាបោះឆ្នោតជ្រើសតាំងតំណាងរាស្ត្រ នីតិកាលទី៥ ឆ្នាំ២០១៣ ដែលជាថ្ងៃបើកឆាកដំបូង នាថ្ងៃទី២៧ ខែមិថុនា ឆ្នាំ២០១៣ គណបក្សនយោបាយ ដែលបានចូលរួមប្រកួតប្រជែងនឹងធ្វើសកម្មភាពឃោសនា នៅតាមទីតាំងផ្សេងៗគ្នា ដើម្បីថ្លែងសារនយោបាយរបស់ខ្លួនក្នុងការទាក់ទាញការគាំទ្រពី ម្ចាស់ឆ្នោត។សម្រាប់គណបក្សប្រជាជនកម្ពុជា ដែលកំពុងតែកាន់អំណាច និងគណបក្សសង្គ្រោះជាតិ ដែលជាគណបក្សប្រឆាំង នៅរាជធានីភ្នំពេញ នឹងធ្វើយុទ្ធនាការឃោសនាបោះឆ្នោតជាទ្រង់ទ្រាយធំនៅកន្លែងផ្សេងគ្នា។
លោក អ៊ក គីមហាន ប្រធាននាយកដ្ឋានបូកសរុប ខុទ្ទកាល័យគណៈកម្មាធិការកណ្តាលគណបក្សប្រជាជនកម្ពុជា បានមានប្រសាសន៍ប្រាប់រស្មីកម្ពុជាឲ្យដឹងថា សមាជិក សមាជិកា គណបក្សប្រជាជនកម្ពុជានឹងធ្វើការជួបជុំគ្នានៅមជ្ឈមណ្ឌល សន្និបាតកោះពេជ្រ ដោយមានអ្នកចូលរួមចំនួន ១២០០០នាក់ និងមានរថយន្តចំនួន ៩០០គ្រឿង រួមទាំងមានអ្នកសិល្បៈ តារាសម្តែង អ្នកចម្រៀងល្បីៗនៅក្នុងប្រទេសកម្ពុជាចូលរួមជាង១០០នាក់ផងដែរ។ បន្ទាប់ពីជួបជុំនៅកោះពេជ្រ គណបក្សប្រជាជនកម្ពុជា នឹងធ្វើការដង្ហែក្បួនយុទ្ធនាការឃោសនាបោះឆ្នោតចេញទៅខណ្ឌទាំង៩ ក្នុងរាជធានីភ្នំពេញ។
អនុប្រធានក្រុមការងារគណបក្សសង្គ្រោះជាតិរាជធានីភ្នំពេញ បានបញ្ជាក់ថា “ការហែក្បួននេះមានគោលបំណង៣ ដោយគោលបំណងទី១- ចែកខិត្តប័ណ្ណ ទី២- ចាក់មេក្រូថ្លែងសារនយោបាយ និងទី៣- ចែករូបភាពគណបក្ស និងពាក្យស្លោក ដើម្បីឲ្យប្រជាពលរដ្ឋកាន់តែស្គាល់ច្បាស់ពីគណបក្សសង្គ្រោះជាតិ”។
រីឯគណបក្សហ្វ៊ុនស៊ិនប៉ិច នៅថ្ងៃដំបូងនៃយុទ្ធនាការឃោសនាបោះឆ្នោតនៅថ្ងៃទី២៧ ខែមិថុនា ឆ្នាំ២០១៣ នេះ គឺមិនបានជួបជុំគ្នានៅរាជធានីភ្នំពេញនោះទេ ដោយទៅធ្វើយុទ្ធនាការឃោសនាជាទ្រង់ទ្រាយធំនៅខេត្តកំពង់ចាម។
លោក ទុំ សម្បុរ អ្នកនាំពាក្យគណបក្ស ហ្វ៊ុនស៊ិនប៉ិច បានមានប្រសាសន៍ឲ្យដឹងថា គណបក្សហ្វ៊ិនស៊ិនប៉ិច ធ្វើយុទ្ធនាការឃោសនាធំនៅខេត្តកំពង់ចាម ដោយធ្វើការជួបជុំគ្នានៅសង្កាត់វាលវង់ ក្រុងកំពង់ចាម ដោយមានអ្នកចូលរួមប្រមាណជាង ៦០០០នាក់ មានរថយន្តជាង ១០០គ្រឿង និងម៉ូតូជាង២០០០គ្រឿង។ សមាជិកចូលរួមឃោសនាពាក់អាវគណបក្ស ដែលមានពណ៌លឿង និងមួកពណ៌លឿង មានរូបសញ្ញាគណបក្ស។
លោកបន្តថា នៅក្នុងយុទ្ធនាការឃោសនានេះ គឺសម្តេចព្រះរាជបុត្រី ព្រះអនុជ នរោត្តម អរុណរស្មី ព្រះរាជបុត្រីពៅសម្តេចឪ និងជាព្រះប្រធានគណបក្ស និងលោកឧបនាយករដ្ឋមន្ត្រី ញឹក ប៊ុនឆៃ អគ្គលេខាធិការគណបក្ស រួមទាំងមន្ត្រីជាន់ខ្ពស់ ចូលរួមបើកយុទ្ធនាការឃោសនា។ បន្ទាប់ពីជួបជុំគ្នារួចរាល់អស់ហើយ នឹងធ្វើការហែក្បួនជុំវិញខេត្ត រួចបំបែកគ្នាទៅតាមស្រុកនីមួយៗ។
លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានមានប្រសាសន៍ឲ្យដឹងថា គណបក្សរបស់លោកនឹងធ្វើយុទ្ធនាការឃោសនា នៅថ្ងៃដំបូង នៅរាជធានីភ្នំពេញ ដោយមានអ្នកចូលរួមប្រមាណជាង ១០០០នាក់ ដោយជួបជុំគ្នានៅទីស្នាក់ការគណបក្ស ស្ថិតនៅផ្ទះលេខ១០៨B2 ផ្លូវ៣១៥ សង្កាត់បឹងកក់២ ខណ្ឌទួលគោក។
លោកបានបន្តថា បន្ទាប់ពីជួបជុំគ្នារួច នឹងធ្វើការហែក្បួនទៅរង្វង់មូលទីក្រុងតាខ្មៅ រួចធ្វើការហែក្បួនវិលចូលមករាជធានីភ្នំពេញវិញ។
លោក សេង សុខេង ប្រធានគណបក្សសញ្ជាតិកម្ពុជា បានមានប្រសាសន៍ឲ្យដឹងថា នៅក្នុងថ្ងៃបើកយុទ្ធនាការឃោសនាបោះឆ្នោតដំបូង គណបក្សរបស់លោកមិនបានជួបជុំគ្នានៅរាជធានីភ្នំពេញទេ ប៉ុន្តែបើកយុទ្ធនាការនៅខេត្តកណ្តាល ស្ថិតនៅឃុំស៊ីធរ ស្រុកខ្សាច់កណ្តាល ដោយមានអ្នកចូលរួមប្រមាណជាង ១០០០ នាក់ និងមានរថយន្តចំនួន ១០០ គ្រឿង។ បន្ទាប់ពីធ្វើការឃោសនានៅខេត្តកណ្តាលរួច នឹងធ្វើការដង្ហែក្បួនឆ្ពោះទៅកាន់ខេត្តព្រៃវែង។
លោក ចាន់ យ៉េត អនុប្រធានគណបក្សសាធារណរដ្ឋប្រជាធិបតេយ្យ បានឲ្យដឹងថា គណបក្សរបស់លោក មិនធ្វើការបើកយុទ្ធនាការនៅរាជធានីភ្នំពេញទេ គឺធ្វើយុទ្ធនាការឃោសនាបោះឆ្នោតនៅខេត្តស្វាយរៀង ដោយមានអ្នកចូលរួមប្រមាណជា ៥០០ នាក់តែប៉ុណ្ណោះ ដោយមានម៉ូតូកង់បី និងគោយន្ត ខុសពីគណបក្សដទៃ ដោយសារតែគណបក្សរបស់លោកមិនសូវមានថវិកា។
ចំណែកគណបក្សខ្មែរឈប់ក្រ និងគណបក្សខ្មែរអភិវឌ្ឍន៍សេដ្ឋកិច្ច មិនទទួលបានដំណឹងពីការហែក្បួនឃោសនាបោះឆ្នោតនោះទេ។
ប្រតិទិននៃការបោះឆ្នោតជ្រើសតាំងតំណាងរាស្ត្រនីតិកាលទី៥ ឆ្នាំ២០១៣ របស់គណៈកម្មាធិការជាតិរៀបចំការបោះឆ្នោត (គ.ជ.ប.) បានឲ្យដឹងថា យុទ្ធនាការឃោសនាបោះឆ្នោតចាប់ផ្តើមប្រព្រឹត្តទៅពីថ្ងៃទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣ ។ ហើយនៅថ្ងៃទី២៨ ខែកក្កដា គឺជាថ្ងៃបោះឆ្នោត និងរាប់សន្លឹកឆ្នោត និងការបិទផ្សាយលទ្ធផលបឋមនៅការិយាល័យបោះឆ្នោត៕
