Published on Thu 25 Jul, 2013 at 02:16 02:16 by . | 15 views យ៉ាងហោចណាស់មនុស្ស៣៥នាក់បានស្លាប់បាត់បង់ជីវិត និងជាង២០០នាក់ទៀត បានរងរបួស នៅក្នុងគ្រោះថ្នាក់រថភ្លើងរត់ចេញពីផ្លូវមួយ នៅភូមិ ស៊ាំងហ្សាក់ ឌឺ កុំប៉ូស្ទែល (Saint-Jacques de Compostelle) ផ្នែកខាងពាយព្យនៃប្រទេសអេស្ប៉ាញ។ នេះជាការថ្លែងឲ្យដឹងរបស់ប្រធានក្រុមប្រឹក្សាតំបន់ ហ្គាលីស (Galice) លោក អាលប៊ែរតូ នូណេ ហ្វីចូ (Alberto Nuñez Feijoo)។
ទិដ្ឋភាពនៃរថភ្លើងដួលដេករណូករណែល នៅលើផ្លូវដែក។ (រូបថត Oscar Corral/Reuters)
លោកប្រធានក្រុមប្រឹក្សាតំបន់ បានអះអាងតាមវិទ្យុប្រចាំតំបន់មួយថា «មានមនុស្សយ៉ាងហោចណាស់ ៤៥នាក់ស្លាប់» ដោយបានបន្ថែមថាមានមនុស្សរបួសជាង២០០នាក់ផ្សេងទៀត។ លោកបានពិពណ៌នាពីទស្សនីយភាពរន្ធត់ខ្លោចផ្សារមួយ ដែលកើតឡើងពីគ្រោះថ្នាក់នេះ។
លោកបានបន្តឲ្យដឹងទៀតថា «មានទូររថភ្លើងមួយបានរួញកំពិត ចូលគ្នា ហើយមានសាកសពជាច្រើន នៅលើផ្លូវដែក»។ តើតាមក្រុមហ៊ុនដឹកជញ្ជូនផ្លូវដែក បានបញ្ជាក់ថា រថភ្លើងមួយខ្សែនេះ ផ្ទុកមនុស្សចំនួន២៣៨នាក់។
«ទូរថភ្លើងជាច្រើនទៀត បានដួលដែកបន្តបន្ទាប់គ្នា»
រូបភាពដំបូងដែលបង្ហាញនៅតាមកញ្ចក់ទូរទស្សន៍ បានធ្វើឲ្យឃើញមានទូរថភ្លើងចំនួនបួន បានដួលត្រឡប់ត្រឡិននៅលើផ្លូវដែក ដែលក្នុងនោះមានយ៉ាងហោចទូមួយ បានរួញកំពិតសឹងតែទាំងអស់ និងមានផ្សែងហុយចេញពីទូរថភ្លើងដួលរណូករណែលទាំងនេះ។
សាក្សីមួយរូបបាននិយាយប្រាប់វិទ្យុក្នុងស្រុកមួយថា «ទំនងជានៅមុនរថភ្លើងបត់ចេញ ទូរថភ្លើងចាប់ផ្ដើមប្រទាញប្រទង់គ្នា។ យើងរមៀលជាច្រើនត្រឡប់ មុននឹងទូរថភ្លើងទាំងនោះ បានដួលដេកត្រឡប់ត្រឡិន បន្តបន្ទាប់គ្នានោះ។»
«មូលហេតុមួយ ដែលមិនទាន់អាចដឹងបាន»
គ្រោះថ្នាក់បានកើតឡើងនៅចម្ងាយប៉ុន្មានគីឡូម៉ែត្រ ពីស្ថានីយ ស៊ាំងហ្សាក់ ឌឺ កុំប៉ូស្ទែល ខណៈដែលរថភ្លើងនេះរត់ភ្ជាប់ពីរាជធានីម៉ាឌ្រីដ ទៅតំបន់អែល ហ្វែរ៉ូល (El Ferrol)។ គ្រោះថ្នាក់បានចាប់ផ្ដើមនៅម៉ោងប្រមាណជា ៩យប់ ម៉ោងក្នុងស្រុក។ មូលហេតុដែលឈានទៅដល់ គ្រោះថ្នាក់ដ៏ប្រល័យនេះ គេនៅមិនទានដឹងថាជអ្វីនោះនៅឡើយ៕
សូមទស្សនាវីដេអូខាងក្រោមនេះ ដូចតទៅ៖
