ដៃ គឺជាអវយវៈធ្វើការងារច្រើនជាងគេ។ ក្រចកដៃបែក ស្បែកដៃប្រេះក្រហែង ស្បែកដៃរលាត់ ឬរបក កន្ទួលរមាស់ និងការចម្លងរោគ គឺជាបញ្ហាដែលច្រើនកើតមាននៅត្រង់ដៃ។ ប៉ុន្តែអ្នកអាចបំបាត់បានរាល់អាការ ទាំងនេះ តាមរយៈវិធីសាស្ត្រងាយៗ នៅផ្ទះនាពេលសម្រាកលម្ហែកាយ។ នៅពេលធ្វើ
ការងារសម្អាត ផ្ទះសម្បែង គួរពាក់ស្រោមដៃការពារ កុំឲ្យភាពកខ្វក់ និងសារធាតុគីមីចង្រៃប៉ះពាល់ដៃអ្នក។ ដោយឡែកក្រចកបែរជាផុយ នៅពេលត្រាំនៅក្នុងទឹកយូរ ហើយរឹងក្រញង់នៅពេលស្ងួត ជាហេតុធ្វើឲ្យក្រចកងាយដាច់ដោច ដូច្នេះត្រូវការពារកុំឲ្យប៉ះពាល់ត្រូវទឹកយូរខ្លាំងពេក។
ជាតិ acetone អាចបណ្ដាលឱ្យរោល និងធ្វើឱ្យស្បែកដៃជ្រីវជ្រួញ។ ដូច្នេះប្រើថ្នាំប៉ូលាក្រចក ដែលមិនមានជាតិ acetone ឱ្យបានញឹកញាប់។ ការធ្វើម៉ាស្សាដៃរៀងរាល់យប់ មុនពេលចូលគេង ដោយប្រើប្រេងដូង ឬប្រេងអាល់ម៉ុន ធ្វើឱ្យស្បែកដៃទន់រលោង និងមានសំណើម។ ជម្រើសផ្សេងទៀត អ្នកអាចលាបវ៉ាសឺលីន ឬក្រែមផ្ដល់សំណើមដល់ស្បែក និងពាក់ស្រោមដៃអំបោះ។
ការធ្វើម៉ាស្សាដៃជាមួយនឹងទឹកក្រូចឆ្មារ ធ្វើឱ្យដៃស្រទន់ស្រស់ស្អាត បំបាត់ស្នាមប្រឡាក់ និងខ្លិនអសោចជាប់នៅនឹងដៃ និងធ្វើឱ្យក្រចករឹងមាំល្អ។ អ្នកក៏អាចលាបទឹកត្រសក់លាយជាមួយនឹងគ្លីសេរីន ២-៣ តំណក់ ដើម្បីធ្វើឱ្យដៃទន់ល្មើយ។ ដោយឡែក អ្នកអាចលាយប្រេងអូលីវ ប្រេងអាល់ម៉ុន ទឹកក្រូចឆ្មារពីរបីតំណក់ជាមួយនឹងទឹក ហើយរក្សាទុកនៅក្នុងដបមួយ។ លាបទឹកលាយនេះពីរបីតំណក់នៅនឹងដៃ មុនពេលអ្នកចេញទៅណាមកណា ដើម្បីធ្វើឱ្យដៃអ្នកមានសំណើមស្រស់ថ្លា។
វិធីសាស្ដ្រផ្សេងទៀត គឺយកទឹកប៉េះបោះ ទឹកក្រូចឆ្មារ និងគ្លីសេរីនពីរបីតំណក់ ដែលមានសមមាត្រស្មើគ្នាធ្វើជាម្សៅ ហើយលាបដៃរបស់អ្នក។ អ្នកក៏អាចប្រើម្សៅ ដែលធ្វើពីផ្លែអាល់ម៉ុនម៉ដ្ឋក្រែមទឹកដោះ និងគ្លីសេរីនពីរបីតំណក់លាយបញ្ចូលគ្នា ពីព្រោះការលាយបញ្ចូលគ្នានេះ គឺជាឱសថបែបធម្មជាតិដ៏ល្អ ជួយធ្វើឱ្យស្បែកដៃអ្នកស។ អ្នកអាចធ្វើឱ្យដៃស្រស់ស្អាត ដោយដាក់ប្រេងកាស្ដ្រូ (castro oil) និងប្រេងអាល់ម៉ុន ហើយលាយជាមួយទឹកក្រូចឆ្មារមួយផ្លែនៅក្នុងចានមួយ ហើយលាបដៃឱ្យសើម ទុករយៈពេលពី ១០-១៥នាទី ហើយទើបធ្វើម៉ាស្សាដៃនោះ។
ដោយសារដៃ គឺជាផ្នែកមួយដំបូងគេនៃសាព៌ាង្គកាយ ក្នុងការបង្ហាញពីវ័យ ការធ្វើក្រចក គឺជាគំនិតដ៏ល្អមួយ។ ត្រូវថែរក្សាដៃដោយកាត់ក្រចក ខាត់ក្រចក សម្អាតបរិវេណជុំវិញក្រចក គល់ក្រចក ឬក្នុងក្រចក និងដុសក្រចកឱ្យបានស្អាតជាប្រចាំ។ បន្ទាប់មកត្រាំដៃក្នុងទឹកក្ដៅឧណ្ណៗ មានដាក់សាប៊ូបន្ដិច (ដូចជាសាប៊ូកូនក្មេង) ប្រមាណ ២-៣ នាទី។ ដុសលាងសម្អាតដៃឱ្យសព្វ ជាមួយទឹក បន្ទាប់មកជូតឱ្យស្ងួតដោយប្រើកន្សែងស្អាត។ លាបក្រែមសម្លាប់មេរោគ (anticeptic) ហើយសម្អាតក្រចកដោយប្រើប្រដាប់សម្អាតក្រចកជាមួយនឹងសំឡី។ ប្រើទឹកឡូហ្សិនផ្ដល់សំណើម និងធ្វើម៉ាស្សាដៃអ្នកប្រមាណ៥នាទី។ ការធ្វើម៉ាស្សាដៃ នឹងជួយធ្វើឱ្យចលនាឈាមរត់ស្រួល ធ្វើឱ្យស្បែកដៃទន់ល្មើយ និងធ្វើឱ្យដៃស្រស់ស្អាតទៀតផង៕
ប្រែសម្រួល ៖ សុនីតា o(o_O)o
© រក្សាសិទ្ធិគ្រប់យ៉ាងដោយ គេហទំព័រ ស៊ីវិល័យ
