បាញ់ថ្នាំដំឡូងមី​កំពុង​មេឃភ្លៀងរន្ទះបាញ់ ត្រូវ​មនុស្ស​០៣នាក់​ស្លាប់​ម្នាក់​សន្លប់ ០២នាក់

នគរបាលជាតិ · Monday, 12 August 2013 Share to: Facebook · Google+ · Tweet
ខេត្ត ​បន្ទាយមានជ័យ៖​បុរស​០៣នាក់​ស៊ី​ឈ្នួល​បាញ់​ថ្នាំ​ស្មៅ​នៅ​ចំការ​ដំឡូងមី​ ឲ្យ​គេ​នៅ​ពេល​មេឃ​បម្រុង​ភ្លៀង ត្រូវ​រន្ទះ​បាញ់​បណ្តាល​ស្លាប់​ម្នាក់​នៅ​កន្លែង​កើតហេតុ​ចំណែក​០២នាក់​ទៀត ​រង​របួស​រហូត​សន្លប់​បាត់​ស្មារតី បន្ទាប់​មក​ជន​រងគ្រោះ​ទាំង​០២នាក់​ត្រូវ​បាន​គេ​ដឹក​យក​ទៅ​សង្រ្គោះ​នៅ​ មន្ទីរពេទ្យ​។ ហេតុការណ៍​នេះ​កើត​ឡើង​នៅ​វេលា​ម៉ោង​០៣រសៀល ថ្ងៃ​ទី​១១ ខែ​សីហា ឆ្នាំ​២០១៣ នៅ​ខាង​ត្បូង​ភូមិ​បឹងស្នោ​ជាង​៥០០ម៉ែត្រ ស្ថិត​នៅ​ភូមិ​បឹងស្នោ ឃុំ​ស្លក្រាម ស្រុក​ស្វាយចេក ខេត្ត​
បន្ទាយមានជ័យ​។
បើ ​តាម​ប្រភព​ព័ត៌មាន​ពី​នគរបាល​ស្រុក​ស្វាយ​ចេក​បាន​ឲ្យ​ដឹង​ថា​៖​ជន​រងគ្រោះ ​បាត់​បង់​ជីវិត​មាន​ឈ្មោះ រស់ រី អាយុ​២៤ឆ្នាំ មក​ស្នាក់​នៅ​បណ្តោះ​អាសន្ន​ធ្វើ​ជា​កម្មករ​នៅ​ភូមិ ឃុំ​ខាង​លើ មាន​ស្រុក​កំណើត​នៅ​ខេត្ត​សៀមរាប​។​ជន​រងគ្រោះ​ទទួល​រង​របួស​មាន​ឈ្មោះ នង់ អែក អាយុ​២៥ឆ្នាំ ប្រកប​មុខ​របរ​កម្មករ​រស់​នៅ​ភូមិ​ខ្លែង​ពណ៌​ជើង ឃុំ​ស្លក្រាម ស្រុក​ស្វាយចេក និង​ឈ្មោះ គុំ អាយុ​២៥ឆ្នាំ មក​ស្នាក់​នៅ​បណ្តោះ​អាសន្ន​នៅ​ភូមិ ឃុំ​ខាង​លើ ស្រុក​កំណើត នៅ ខេត្ត​សៀមរាប​។​បើ​តាម​ប្រភព​ព័ត៌មាន​ដដែល​បាន​ឲ្យ​ដឹង​ទៀត​ថា​៖មុន​ពេល​កើត ​ហេតុ​គឺ​មាន​កម្មករ​ចំនួន​ជាង​១០នាក់​បាន​ស៊ី​ឈ្នួល​បាញ់​ស្មៅ​ចំការ​ ដំឡូងមី ឲ្យ​ម្ចាស់​ចំការ​ឈ្មោះ សៀង ដាវី ភេទ ប្រុស អាយុ​៥២ឆ្នាំ រស់ នៅ​ខេត្ត​បាត់ដំបង​។ លុះ​បន្ទាប់​មក​ស្រាប់​តែ​មាន​មេឃ​ខ្មៅ លាយ​ឡំ ជាមួយ​ផ្គរ​រន្ទះ និង​ភ្លៀង​ធ្លាក់​មួយ​ចំនួន ។​ឃើញ​មេឃ​មាន​សភាព​ដូច្នេះ កម្មករ​ខ្លះ​បាន​នាំ​គ្នា ទាញ​ទូរស័ព្ទ​ពី​ហោ​ប៉ៅ​បិទ ប៉ុន្តែ មិន​ទាន់​បាន​បិទ​ផង ស្រាប់​តែ​រន្ទះ​បាញ់​លាន់​ស្នូរ​យ៉ាង​កក្រើក ត្រូវ​ចំ​ជន​រងគ្រោះ​ទាំង​០៣នាក់​ដេក​ដួល​រណូក​រណែល​។ បន្ទាប់​មក​គេ​ឃើញ​ឈ្មោះ រស់ រី បាន​ដាច់​ខ្យល់​ស្លាប់​ទៅ​ហើយ ចំណែក​០២នាក់​ទៀត ដេក​ដួល​សន្លប់ ត្រូវ​បាន​កម្មករ​ដូចគ្នា ដឹក​យក​មក​សង្រ្គោះ​ជីវិត​នៅ​មន្ទីរពេទ្យ​នៅ​ក្រុង​សិរីសោភ័ណ។ ក្រោយ​ពី​កើត​ហេតុ​ម្ចាស់​ចំការ បាន​ចាត់​ចែង​ទំនាក់​ទំនង​សាច់ញាតិ​មក​ទទួល​យក​សព​ជន​រងគ្រោះ​យក​ទៅ ធ្វើ​បុណ្យ តាម ប្រពៃណី​នៅ​ខេត្ត​សៀមរាប ក្នុង​នោះ​ឧបត្ថម្ភ​ថវិកា​គ្រួសារ​ជន​រងគ្រោះ​១០០០ដូល្លា​ផង​ដែរ ៕