ក្នុងអង្គពិធីនោះលោក ង៉ោ ម៉េងជ្រួន អភិបាលក្រុងប៉ោយប៉ែតបានឡើងថ្លែងទៅកាន់អ្នកចូលរួម
ទាំងអស់ថា ចាប់តាំងពីថ្ងៃទី២៧ ខែមិថុនា ដល់ថ្ងៃទី២៦ កក្កដា ឆ្នាំ២០១៣ នៅក្នុងប៉ោយប៉ែតដំណើរការឃោសនាបោះឆ្នោតរបស់គ្រប់គណបក្សនយោបាយដែល ចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រនីតិកាលទៅ ៥ គឺបានប្រព្រឹត្តទៅប្រកបដោយសុវត្ថិភាពតាមប្រតិទិនការងារដែលបានស្នើ សុំទៅគណៈកម្មាធិការសង្កាត់រៀបចំការបោះឆ្នោត។ ជារួមគួរកត់សម្គាល់បានថា ក្នុងយុទ្ធនាការឃោសនារកសំឡេងឆ្នោតមានគណបក្សចំនួនពីរ ដែលមានសកម្មភាពផុសផុលគឺគណបក្សប្រជាជនកម្ពុជា និងគណបក្សសង្គ្រោះជាតិ។
លោកអភិបាលបានបន្តទៀតថា ស្របពេលនឹងដំណើរការបោះឆ្នោតរាប់សន្លឹកឆ្នោតត្រូវបានបញ្ចប់នា ថ្ងៃទី២៨ ខែកក្កដា ឆ្នាំ២០១៣កន្លងមកនេះ ទូទាំងក្រុងប៉ោយប៉ែតបានប្រឈមនឹងស្ថានភាពទឹកជំនន់ ដោយសារតែទឹកភ្លៀងយ៉ាងជោកជាំ ជាហេតុធ្វើឲ្យលិចលង់ហេដ្ឋារចនាសម្ព័ន្ធផ្លូវគមនាគមន៍ សាលារៀន វត្តអារ៉ាម និងលំនៅដ្ឋានប្រពលរដ្ឋជាច្រើនខ្នង រួមនិងដីស្រែចំការ ដែលស្ថិតនៅសង្កាត់និមិត្ត និងសង្កាត់ប៉ោយប៉ែត ។ កត្តាសំខាន់ចាំបាច់ត្រូវអាជ្ញាធរក្រុង ជាពិសេសនោះគឺអង្គភាពមានសមត្ថកិច្ចរួមមាន នគរបាលគ្រប់អង្គភាពឈរជើងនៅក្នុងក្រុង កងរាជអាវុធហត្ថ ត្រូវខិតខំយកចិត្តទុកដាក់ឲ្យបានខ្លាំងក្នុងការជួយសង្គ្រោះ ឧបត្ថម្ភ និងការពារប្រជាពលរដ្ឋគ្រប់ពេលវេលា។
ក្នុងឯកឧត្តម ទ្រី ណារិន បានថ្លែងទៅកាន់បងប្អូនអាជ្ញាធរ សមត្ថកិច្ចគ្រប់ស្ថាប័នថា ទោះបីជាការបោះឆ្នោតជ្រើសតាំងតំណាងរាស្ត្រនីតិកាលទី៥នេះបានបញ្ចប់ នៅក្នុងខេត្តបន្ទាយមានជ័យមានភាពស្ងប់ស្ងាត់ក៏ដោយ ចាំបាច់ត្រូវរក្សាស្ថិរភាពសន្តិសុខ សណ្តាប់ធ្នាប់នៅតាមមូលដ្ឋានឲ្យបានល្អ។ ប៉ុន្តែបើក្រឡេកមើលពីបញ្ហាទឹកជំនន់វិញ ត្រូវយកចិត្តទុកដាក់ឲ្យបានខ្ពស់អំពីបញ្ហាសុវត្ថិភាពប្រជាពលរដ្ឋ ជាពិសេសនោះគឺសុខភាព អនាម័យ ចាស់ជរា ជនពិការ កុមារាតូចៗ ឲ្យជៀសផុតពីជំងឺទាំងឡាយ៕ ដោយ ៖ ចិន្តា
