ខេត្តព្រះសីហនុ ៖ រថយន្តធុនធំសណ្តោងកុងតឺន័រមួយគ្រឿង បានរេចង្កូតទៅបុករថយន្តម៉ាកធុនដ្រាមួយគ្រឿងទៀត ដែលកំពុងបើកបរបញ្ច្រាសទិសគ្នាពេញទំហឹង បង្កឲ្យមានការភ្ញាក់ផ្អើលនិងកកស្ទះ ចរាចរណ៍ជាច្រើនម៉ោង។ ហេតុការណ៍នេះបានកើតឡើងកាលពីវេលាម៉ោង១០និង១០នាទីព្រឹកថ្ងៃទី១៣ ខែសីហា ឆ្នាំ២០១៣ នៅលើកំណាត់ផ្លូវជាតិលេខ៤ នៅចំណុចមុខមន្ទីរសាធារណការ និងដឹកជញ្ជូនខេត្ត ត្រង់ផ្លូវចំណោតលោកយាយម៉ៅ ស្ថិតក្នុងភូមិ៣ សង្កាត់១ ក្រុងព្រះសីហនុ។
បើតាមប្រភពព័ត៌មានពីសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តធុនធំ ម៉ាកនីសាន់ សណ្តោងកុងតឺន័រ ពណ៌ទឹកប្រាក់ ពាក់ស្លាកលេខភ្នំពេញ 3A-1681 បើកបរដោយបុរសម្នាក់ឈ្មោះ ញ៉ែម ថា អាយុ៣១ឆ្នាំ ធ្វើដំណើរក្នុងទិសដៅពីកើតទៅលិច។ ខណៈពេលដែលបើកបរមកដល់ចំណុចកើតហេតុ រថយន្តកុងតឺន័រក៏បានបើកចុះពីលើចំណោទក្នុងល្បឿនលឿន ស្រាប់តែបានវ៉ាក់ជាមួយរថយន្តម៉ាកទីកូនៅខាងមុខ ក៏បួងចង្កូតគេចមកកណ្តាលផ្លូវ ស្របពេលនោះក៏មានរថយន្តម៉ាកធុនដ្រា ពណ៌ខ្មៅ ពាក់ស្លាកលេខភ្នំពេញ 2I-1188 បើកបរដោយបុរសម្នាក់ឈ្មោះ លី គឹមលន់ ភេទប្រុស អាយុ៦០ឆ្នាំ ជាអាជីវករ មានលំនៅផ្ទះលេខ៩ តាមផ្លូវលំម្តុំមាត់ទន្លេនៅព្រែកលាប ក្នុងខណ្ឌឫស្សីកែវ ដែលកំពុងបើកឡើងចំណោទ ក៏បានបុកគ្នាយ៉ាងពេញទំហឹង បណ្តាលឲ្យភាគីខាងរថយន្តធុនដ្រារងការខូចខាតផ្នែកខាងមុខធ្ងន់ធ្ងរ ។ ប៉ុន្តែជាសំណាងល្អក្នុងហេតុការណ៍នេះ ពុំបានបណ្តាលឲ្យមានមនុស្សណាម្នាក់រងរបួសនោះទេ។
បន្ទាប់ពីកើតហេតុ កម្លាំងសមត្ថកិច្ចចរាចរណ៍ខេត្តបានចុះទៅអន្តរាគមន៍ ដើម្បីធ្វើការវាស់វែង និងបាននាំយករថយន្តទាំង២ទៅរក្សាទុកជាបណ្តោះអាសន្ននៅ អធិការដ្ឋានរបស់រង់ចាំធ្វើការដោះស្រាយនៅពេលក្រោយ៕
