យោង​តាម​ប្រសាសន៍​របស់​អគ្គ​មេបញ្ជាការ​កងទ័ព​ជើង​ទឹក​ចិន​បាន​​ឱ្យ​ដឹង​ថា​​ ទីក្រុង​ប៉េកាំង​បាន​បញ្ជូន​នាវា​ចម្បាំង និង​កងទ័ព​ជើងទឹក​របស់​ខ្លួន ​ដើម្បី​ចូល​រួម​ធ្វើ​សម​យុទ្ធ​យោធា​ទ្រង់ទ្រាយ​ធំ​រួម​មួយ​ជាមួយ​អាមេរិក​​ កាល​ពី​ម្សិលមិញ​នៅ​​ក្បែរប្រជុំកោះ​Hawaii​​។ ​
ដោយ​មាន​វត្តមាន​នាវា​ផ្ទុក​មីស៊ីល​ស្វ័យ​​នាំ​ផ្លូវ​ Qingdao និង​នាវា​ល្បាត​ Hongzehu រួម​ទាំង​កងទ័ព​ជើងទឹក​របស់​ប្រទេស​នេះ​​មួយ​ចំនួន​ទៀត​បាន​​ធ្វើ​សម​យុទ្ធ​ រួម​ជា​មួយ​​​កង​ទ័ព​អាមេរិក​ និង​បណ្ដា​
ប្រទេស​ជា​មិត្ត​ដែល​ក្នុង​នោះ​​រួមមាន​ អូស្ត្រាលី និង​បណ្ដា​ប្រទេស​នៅ​​អាស៊ាន​មួយ​ចំនួន​ទៀត​​។
លោក ​Xu Hongmeng ជា​អគ្គ​មេ​បញ្ជាការ​រង​កងទ័ព​ជើង​ទឹក​ចិន ​បាន​​មាន​ប្រសាសន៍​ថា វត្តមាន​របស់​ចិន​នៅ​ក្នុង​សម​យុទ្ធ​ខាងលើ​នេះ ​នឹង​ជំរុញ​ឲ្យ​ប្រសើរ​ឡើង​​ចំពោះ​​ទំនាក់ទំនង​ការទូត​​ ផ្នែក​យោធា​​​ និង ជា​​ការ​ពង្រឹង​សមត្ថភាព​កងទ័ព​ជើងទឹក​ចិន​​ជាមួយ​នឹង​អាមេរិក​លើ​បេសកកម្ម ​អន្តរជាតិ​ផ្សេងៗ​ទៀត​នៅ​ពេល​ខាងមុខ។​​​
គេ​សង្កេត​ឃើញ​ថា ​មួយ​ឆ្នាំ​ចុងក្រោយ​នេះ ប្រទេស​មហាអំណាច​សេដ្ឋកិច្ច​នៅ​អាស៊ី​មួយ​នេះ ​ហាក់​កំពុង​​បង្កើន​សមត្ថភាព​កងកម្លាំង​យោធា​របស់​ខ្លួន​ជា​បន្តបន្ទាប់ ជា​ពិសេស​ការ​ធ្វើ​សម​យុទ្ធ​យោធា​រួម ហើយ​ថ្មីៗ កន្លង​ទៅ​នេះ ​ខ្លួន​ទើប​នឹង​បញ្ចប់​សម​យុទ្ធ​យោធា​ទ្រង់ទ្រាយ​ធំ​​រួម​មួយ​ជា​មួយ​នឹង​រុស្សី ខណៈ​បញ្ហា​​ជម្លោះ​ទាមទារ​ដែន​កោះ​នៅ​ក្នុង​​​ដែនទឹក​របស់​ខ្លួន​កំពុង​ស្ថិត​នៅ​ក្នុង​ស្ថានភាព​តានតឹង​នៅឡើយ៕ ​​​​​
ប្រែសម្រួល៖ Narin
ប្រភព៖ Sina