មនុស្ស៥០០ គ្រួសារផ្លាស់ប្តូរ ទីលំនៅដោយសារ ទឹកជំនន់ នៅហ្វីលីពីន

Wednesday, 28 August 2013 05:51 ប្រែសម្រួលៈ ដើមអម្ពិល(DAP) ID-067

ម៉ានីលៈ មនុស្សប្រហែល ៥៤៧គ្រួសារ បានផ្លាស់ប្តូរទីលំនៅ ដោយសារទឹកជំនន់ ដែលបានកើតឡើង ត្រង់ចំណុចកណ្តាលនៃប្រទេស ហ្វីលីពីន ត្រង់ខេត្ត Samar ខណៈដែលខ្យល់ព្យុះត្រូពិច ដែលមានឈ្មោះថា Kong-Rey ឬ Nando បានបោកបក់កាត់ប្រទេសហ្វីលីពីន។ នេះបើយោងតាមការលើកឡើងរបស់មន្ត្រី រដ្ឋាភិបាលជាន់ខ្ពស់ ម្នាក់បានឲ្យដឹងកាលពីថ្ងៃអង្គារកន្លងទៅនេះ។

ទីភ្នាក់ងារសារព័ត៌មាន ចិនស៊ិនហួ ចុះថ្ងៃទី២៨ ខែសីហា ឆ្នាំ២០១៣នេះបានឲ្យដឹងដោយលើកឡើ
ងនូវ សំដីរបស់អ្នកនាំពាក្យ របស់តំណាងប្រធានាធិបតីថា ក្រុមគ្រួសាររងគ្រោះ បានមកពីភូមិចំនួន ១១ ក្នុងខេត្ត Samar ដែលបានជ្រកកោននៅសាលា ដែលប្រើប្រាស់ធ្វើជាជំរុំ ភៀសខ្លួនបណ្តោះអាសន្ន។
អ្នកនាំពាក្យរូបនេះ បានបន្តថា ទោះបីជាយ៉ាងនេះក្តី រដ្ឋាភិបាលនៅតែបន្តក្រើនរំលឹកបង្កើនការ ប្រុងប្រយ័ត្ន ចំពោះខ្យល់ព្យុះផ្សេងទៀត។
ភ្នាក់ងារអាកាសធាតុ បរិយាកាស ភូមិសាស្ត្រ និងតារាសាស្ត្ររបស់ប្រទេស ហ្វីលីពីន ដែលហៅកាត់ថា PAGASA បាននិយាយថា ខ្យល់ព្យុះ Kong-Rey នៅតែមានកម្លាំងខ្លាំងក្លា និងបន្តបោកបក់ឆ្ពោះទៅរកខេត្ត Batanes ភាគខាងជើងប្រទេស។
គួរបញ្ជាក់ថា ខ្យល់ព្យុះត្រូពិកបានបោកបក់ក្នុងកម្លាំង៧៥គីឡូម៉ែត្រក្នុងមួយម៉ោង ក្បែរតំបន់ភាគកណ្តាល និងមានការកើនឡើង រហូតដល់៩០គីឡូម៉ែត្រក្នុងមួយម៉ោងទៀតផង។ នេះជាការលើកឡើងរបស់ភ្នាក់ងារPAGASA៕