ឆ្លើយតប​ទៅ​នឹង​អំពើ​ហិង្សា​ដោយ​បង្ហូរ​ឈាម​ នៅ​អេហ្សីប ​លោក​អូបាម៉ា​បាន​អំពាវនាវ​ឲ្យ​រដ្ឋាភិបាល​អន្តរកាល​​​មួយ​នេះ បញ្ឈប់​អំពើ​ហិង្សា​នេះ​ជា​បន្ទាន់។ ក៏​ប៉ុន្តែ​អ្វី​ដែល​គេ​មើល​ឃើញ​ជា​ទូទៅ​​ហើយ​មិន​អាច​បំភ្លេច​បាន​នោះ​គឺ​ ថា រដ្ឋាភិបាល​វ៉ាស៊ីនតោន​បាន​ផ្ដល់​ជំនួយ​យោធា​យ៉ាងហោចណាស់​ក៏​១​ពាន់​លាន​ ដុល្លារ​ដែរ​ក្នុង​១​ឆ្នាំៗ​ដល់​អេហ្សីប​ អស់​រយៈ​ពេល​ជា​ច្រើន​ទសវត្ស​មក​នេះ ធ្វើ​ឲ្យ​មាន​ការ​ចោទ​ប្រកាន់​ពី​ក្រុម​​គាំទ្រ​​លោក​មូស៊ី ថា អេមេរិក​នៅ​ពី​ក្រោយ​ខ្នង​លើ​ការ​សម្លាប់​រង្គាល​​នេះ។​
ទោះបី​ជា​មាន​ការ​ចោទប្រកាន់​បែប​នេះ​ក្តី ជំនួយ​យោធា​ដ៏​ច្រើន​នេះ បាន​ធ្វើ​ឲ្យ​អេហ្សីប​ក្លាយ​ជា ​សម្ព័ន្ធមិត្ត​ដ៏​សំខាន់​មួយ​របស់​អាមេរិក ​រួចទៅហើយ រហូត​ធ្វើ​ឲ្យ​​អាមេរិក​​បាន​ចុះ​កិច្ចសន្យា​ជា​មួយ​បណ្ដា​ក្រុមហ៊ុន​ជា​ ច្រើន​​សម្រាប់​ផ្គត់ផ្គង់​ និង​បណ្ដុះបណ្ដាល​ដល់​​យោធា​អេហ្សីប​ជាបន្តបន្ទាប់។ ក្រុមហ៊ុន​ទាំងនោះ​បាន​​ចុះកិច្ចសន្យា​ជា​មួយ​នឹង​​​ក្រសួងការពារជាតិ​​ជាតិ ​អាមេរិក​ចាប់​តាំង​ពី​ឆ្នាំ ២០០៩​មក ដែល​​មាន​បញ្ជីរាយនាម​ដូច​ខាងក្រោម​នេះ៖​
១ ក្រុមហ៊ុន​​ផលិតយន្តហោះLockheed Martin
Lockheed Martinទទួល​បាន​ប្រាក់​ចំណូល​២៥៩​លាន​ដុល្លារ​​ពី​អាមេរិក​​លើ​​ការ​ ផ្គត់ផ្គង់​យន្តហោះ​​ប្រភេទ 20 F-16s និង​ការ​ផ្ដល់​ប្រព័ន្ធ​​ឈ្លប​យកការណ៍​ពេល​យប់​ដល់​​​ឧទ្ធម្ភាគចក្រ Apache សម្រាប់​អេហ្សីប។ ចំណូល​៧៤% របស់​ក្រុមហ៊ុន​នេះ​ទទួល​បាន​ពី​ការ​លក់​សព្វាវុធ​ក្នុង​រង្វង់​ទឹកប្រាក់​ ខ្ពស់​បំផុត​រហូត​ដល់​៣៦​ពាន់​លាន​ដុល្លារ​ពី​រដ្ឋាភិបាល​អាមេរិក។
​​​​​​២ ក្រុមហ៊ុន​បច្ចេកវិទ្យា​DRS Technologies
អាមេរិក​បាន​ចុះ​កិច្ចសន្យា​ជា​មួយ​ក្រុមហ៊ុន​ដែល​​មាន​នាយក​ប្រតិបត្តិ​ជា​ សញ្ជាតិ​អ៊ីតាលី​មួយ​នេះ ​
សម្រាប់​ផ្ដល់ រថយន្ត​យោធា ឧបការណ៍​ និង ប្រព័ន្ធ​​ឈ្លប​យកការណ៍  ព្រម​ទាំង​​ធនធាន​ផ្សេងៗ ដទៃ​ទៀត​ដល់​រដ្ឋាភិបាល​អេហ្សីប​​ ដោយ​ទទួល​បាន​ប្រាក់​ចំណូល​៦៥,៧​លាន​ដុល្លារ​កាល​ពី​ឆ្នាំ​២០១០។
៣ ក្រុមហ៊ុន​ប្រព័ន្ធ​ទំនាក់ទំនង​ដែនសមុទ្រ L-3
ក្រុមហ៊ុន​នេះ​បាន​ទទួល​ប្រាក់ចំណូល​ប្រមាណ​៣១,៣​លាន​ដុល្លារ​​​ពី​អាមេរិក​ សម្រាប់​​ផ្គត់ផ្គង់​យោធា​​អេហ្សីប​​​លើ​ប្រព័ន្ធ​សូណារ​ (ប្រព័ន្ធ​ចាប់​​រលក​សំឡេង​នៅ​ក្នុង​ទឹក) និង ឧបករណ៍​សម្រាប់​ផលិត​គ្រឿង​បរិក្ខារ​យោធា។​
៤ ក្រុមហ៊ុន​ប្រឹក្សា Deloitte Consulting
ក្នុង​នាម​ជា​ក្រុមហ៊ុន​ផ្ដល់​ប្រឹក្សា​ជំនាញ​ៗធំ​បំផុត​ទី​២​នៅ​លើ​ពិភពលោក Deloitte  បាន​ទទួល​ប្រាក់​ចំណូល​២៨,១​លាន​ដុល្លារ​ពី​រដ្ឋាភិបាល​អាមេរិក​ក្នុង​ការ​ រៀបចំ​គម្រោង​សម្រាប់​ផ្គត់ផ្គង់​លើ​កម្មវិធី​យន្តហោះ​ចម្បាំង​ដល់​អេហ្សីប។
៥ ក្រុមហ៊ុន​ផលិត​យន្តហោះBoeing
ជាមួយ​នឹង​កេរ្តិ៍ឈ្មោះ​ល្បីល្បាញ​ក្នុង​ការ​ផលិត​យន្តហោះ​ Boeingក៏​មាន​ឈ្មោះ​ជា​ក្រុមហ៊ុន​ធំ​បំផុត​លំដាប់​​ទី​២​នៅ​ក្នុង​ កិច្ចសន្យា​ការពារ​ជាតិ​នៅ​ជុំវិញ​ពិភពលោក ​ដែល​បាន​ទទួល​ទឹកប្រាក់​ប្រមាណ​២២,៥​លាន​ដុល្លារ​ពី​អាមេរិក​​ក្នុង​ការ​ ផ្ដល់​ឧទ្ធម្ភាគចក្រ​ប្រភេទApache កាល​ពី​ឆ្នាំ​២០១០ ដល់​រដ្ឋាភិបាល​អេហ្សីប។
៦ ក្រុមហ៊ុន​ផលិត​អាវុធRaytheon ​​
ដោយ​ទទួល​បាន​ចំណូល​៣១,៦​លាន​ដុល្លារ Raytheon គឺ​ជា​ក្រុមហ៊ុន​ផ្គត់ផ្គង់​កាំជ្រួច​មីស៊ីល​ស្វ័យ​នាំ​ផ្លូវ​បំផុត​នៅ​លើ​ ពិភពលោក និង​បាន​ជួយ​គាំទ្រ​បច្ចេកទេស​ដល់​រដ្ឋាភិបាល​អេហ្សីប និង​ទួរគី​អស់​រយៈ​ពេល​២៦៤​ខែ សម្រាប់​ប្រព័ន្ធ​​ខែល​មីស៊ីល​Hawk។​
៧ ក្រុមហ៊ុន​ផលិត​ឧទ្ធម្ភាគចក្រAgustaWestland
​​​AgustaWestland បាន​ទទួល​ទឹកប្រាក់​១៧,៣​លាន​ដុល្លារ​ពី​អាមេរិក​លើ​ប្រតិបត្តិការ​ បច្ចេកវិទ្យា DRS សម្រាប់​​ការ​ផ្គត់ផ្គង់​​​និង​ជួសជុល​ឧទ្ធម្ភាគចក្រ​ដល់​រដ្ឋាភិបាល​ អេហ្សីប។
៨ ក្រុមហ៊ុន​​ US Motor Works
ក្រុមហ៊ុន​ខាងលើ​នេះ​បាន​ចុះ​កិច្ចសន្យា​ជា​មួយ​​ក្រសួងការពារជាតិ​អាមេរិក​ ក្នុង​រង្វង់​ទឹកប្រាក់​១៤,៥​លាន​ដុល្លារ​កាល​ពី​ឆ្នាំ ២០០៩ សម្រាប់​ផ្គត់ផ្គង់​គ្រឿង​ម៉ាស៊ីន​ និង​ គ្រឿងបន្លាស់​ដល់​កងកម្លាំង​យោធា​អេហ្សីប។ ​​​
៩​ ក្រុមហ៊ុន​ផលិត​យន្តហោះចម្បាំង​ Goodrich Corp
Goodrich Corp បាន​ចុះ​កិច្ចសន្យា​ជាមួយ​នឹង​រដ្ឋាភិបាល​អាមេរិក​ក្នុង​ទំហំ​ទឹកប្រាក់​១០, ៨​លាន​ដុល្លារ​ដើម្បី​ទទួល​បាន​សិទ្ធិ​នៅ​ក្នុង​ការ​ចែកចាយ​ប្រព័ន្ធ​ឈ្លប​ យកការណ៍​ដល់​យន្តហោះ​កងទ័ព​ជើងអាកាស​​អេហ្សីប​ F-16 ។ ​
១០​ ក្រុមហ៊ុន​​បច្ចេកទេសColumbia Group
រដ្ឋាភិបាល​អាមេរិក​បាន​ចុះ​កិច្ចសន្យា​ជា​មួយ​នឹង​ក្រុមហ៊ុន​មួយ​នេះ ក្នុង​ទឹកប្រាក់​ប្រមាណ​១០,៦ លាន​ដុល្លារ​សម្រាប់​ប្រព័ន្ធ​ផ្គត់ផ្គង់​​លើ​សម្ភារៈ​យោធា​មិន​បញ្ចេញ​​ ឈ្មោះ​មួយ តាម​រយៈ​ការ​ផ្ដល់​ជំនាញ​បច្ចេកទេស​ទៅ​កងទ័ព​ជើងទឹក​របស់​អេហ្សីប៕​​​
ប្រែសម្រួល៖ Narin
ប្រភព៖ globalpost