នៅវត្តចំប៉ា ខណ្ឌមានជ័យ ក្រុមពលរដ្ឋរារាំងមិនឲ្យពលរដ្ឋវៀតណាម ចូលបោះឆ្នោត

(ថ្ងៃទី 28 កក្កដា 2013, ម៉ោង 05:42:PM) | ដោយ: សុផល

ភ្នំពេញ: ចាប់​តាំងពី​ព្រឹក​ព្រលឹម ថ្ងៃ​អាទិត្យ​នេះ មាន​ការប្រទូសរ៉ាយ ដោយ​ប្រជាពលរដ្ឋ​ប្រមាណ ៥០០ នាក់ បាន​រារាំង​មិនឲ្យ​ពលរដ្ឋ​វៀតណាម ដែល​មាន​អត្តសញ្ញាណប័ណ្ណ និង​មាន​ឈ្មោះ​​បោះឆ្នោត​ត្រឹមត្រូវ ចូល​បោះឆ្នោត ក្នុង​ការិយាល័យ​បោះឆ្នោត នៅ​វត្ត​ចំ​ប៉ា ស្ថិតនៅ​ជាប់​ផ្លូវជាតិ​លេខ​១ ក្នុង​សង្កាត់​ក្បាល​កោះ ខណ្ឌមានជ័យ រាជធានី​ភ្នំពេញ​។​

​ហេតុការណ៍​នោះ បាន​កើតឡើង​ពីរដង​។ ទី​១ នៅ​ម៉ោង ៩ និង ៣០ នាទី ព្រឹក​។ លើក​ទី​២ កើតឡើង​នៅ​ម៉ោង ២ រសៀល​។​

​ លោក ហៀក ច័ន្ទ​លាភ អភិបាលរង​ខណ្ឌ​មានជ័យ បានឲ្យដឹងថា នៅក្នុង​ខណ្ឌ​មានជ័យ កើត​មាន​បាតុភាព ដែល​មាន​អ្នក​រារាំង​ពលរដ្ឋ​វៀតណាម ចូល​បោះឆ្នោត គ្រប់កន្លែង ដែល​នាំឲ្យ​បង្កចលាចល​នៅតាម​ការិយាល័យ​បោះ​ឆ្នោត​មួយ​ចំនួន​។​

​យ៉ាងណាក៏ដោយ នៅ​វត្ត​ចំ​ប៉ា គ្រាន់តែ​មាន​ការប្រតាយប្រតប់​បន្តិចបន្តួច ដោយ​មិន​មាន​ហេតុការណ៍​ធ្ងន់ធ្ងរ​ទេ​៕​