ក្រោយពីព្រះមហាក្សត្រប្រោសព្រះរាជទានលើកលែងទោសដល់លោក
សម រង្ស៊ី ប្រធានគណបក្សសង្គ្រោះជាតិ
កាលពីថ្ងៃទី១២ម្សិលមិញនេះ បណ្ដាញសារព័ត៌មាននានាក្នុងស្រុកបានធ្វើការចុះផ្សាយគ្រប់គេហទំព័រ តាមវិទ្យុ កាសែត ទូរទស្សន៍ និងបណ្ដាញទំនាក់ទំនងសង្គមជាដើម។
ព័ត៌មានទាំងនោះគ្រាន់តែបានចុះផ្សាយនូវលិខិតស្នើសុំ របស់សម្ដេចនាយករដ្ឋមន្ដ្រី ហ៊ុន សែន លិខិតលោក សម រង្ស៊ី និងព្រះរាជក្រឹត្យរបស់ព្រះមហាក្រត្សប៉ុណ្ណោះ ពុំមានការធ្វើអត្ថាធិប្បាយអ្វីវែងឆ្ងាយឡើយ។
ការធ្វើសម្បទាននយោបាយរបស់សម្ដេច ហ៊ុន សែន ទៅលើរូបលោក សម រង្ស៊ីគឺជាកាយវិការនយោបាយទន់ភ្លន់មួយដែលអ្នកនយោបាយបង្ហាញពី ឆន្ទៈរួបរួមគ្នា នេះគឺជាគំនិតរបស់អ្នកតាមដាននយោបាយវិវឌ្ឃន៍នៅកម្ពុជាដែល បានបង្ហាញការយល់ឃើញរបស់ខ្លួនផ្សេងៗគ្នាជុំវិញព្រះរាជក្រឹត្យ លើកលែងទោសដល់លោក សម រង្ស៊ី ។
លោក ព្រាប កុល នាយកប្រតិបត្តិនៃអង្គការតម្លាភាពកម្ពុជាបានមានប្រសាសន៍ប្រាប់ សារព័ត៌មានអន្តរជាតិមួយថា «លោក សម រង្ស៊ីត្រូវបានអនុញាតឲ្យចូលមកប្រទេសកម្ពុជាវិញក្រោមការលើកលែងទោស ពីព្រះមហាក្សត្រ នេះគឺជាដំណឹងល្អរបស់ប្រជាពលរដ្ឋខ្មែរទាំងអ្នកគាំទ្របក្សប្រឆាំង ទាំងអ្នក គាំទ្របក្សកាន់អំណាចក៏មានចិត្តមានបេះដូងចង់ឃើញខ្មែរមានការរួបរួម មានការសាមគ្គីគ្នា ខ្ញុំក៏ជឿជាក់ថាមិត្តៗជាជនជាតិបរទេសដែលធ្វើការនៅស្ថានទូត ទាំងអ្នកផ្ដល់ជួយ ទាំងក្នុងតំបន់អាស៊ីក្ដី ទាំងនៅបច្ចឹម នូវអ៊ឺរ៉ុបក្ដីក៏មានការអបអរសាទរ ខ្ញុំគិតថានេះជាដំណោះស្រាយឈ្នះៗសម្រាប់ប្រទេសកម្ពុជា» ។
លោក ទេព នីថា អគ្គលេខាធិការនៃគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងដែរថា បើទោះជាលោក សម រង្ស៊ី អាចទទួលការលើកលែងទោសក្តី ក៏លោក សម រង្ស៊ី នៅតែមិនអាចឈរឈ្មោះ សម្រាប់ការបោះឆ្នោតបានទេ ដោយហេតុថា ការចុះបញ្ជីអ្នកបោះឆ្នោតបានចប់សព្វគ្រប់ទៅហើយ។ ប៉ុន្តែលោកទេព នីថាបញ្ជាក់ថា បើសិនជាលោក សម រង្ស៊ី បានទទួលការលើកលែងទោសពីព្រះមហាក្សត្រមែននោះ គាត់នឹងអាចធ្វើការឃោសនាការបោះឆ្នោតបាន៕
