ខេត្តកំពង់ចាម ៖ មានហេតុការណ៍គ្រោះថ្នាក់ចរាចរណ៍មួយបានកើតឡើង កាលពីវេលាម៉ោង ២រសៀល ថ្ងៃទី៣០ ខែកក្កដា ឆ្នាំ២០១៣ នៅចំណុចស្ពានអូរដា ភូមិអូរដា ឃុំត្រពាំងព្រះ ស្រុកព្រៃឈរ ក្បែរវិទ្យាល័យ រ ណរិទ្ធិគន្ធបុប្ផា ដោយសារមានរថយន្តម៉ាក Fuso មួយគ្រឿងបានបើកគេចពីម៉ូតូ បណ្តាលឲ្យរេចង្កូតទៅបុកបង្គោលបេតុងបង្ហាញទិស ធ្វើឲ្យរថយន្តក្រឡាប់ផ្ងារជើង។
បើតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញ រថយន្តម៉ាក FUSO ពណ៌ស ១គ្រឿង ដឹកសម្បកឡាំងក្រដាសពេញទ្រុងខាងក្រោយ ធ្វើដំណើរចេញពីទីក្រុងភ្នំពេញ ឆ្ពោះមករោងចក្រកាត់ដេរសម្លៀកបំពាក់ស្ថិតក្នុងភូមិអំពិល ស្រុកកំពង់សៀម ខេត្តកំពង់ចាម។ លុះខណៈដែលបើកបរមកដល់ចំណុចកើតហេតុខាងលើ ស្រាប់តែរថយន្តបានបើកគេចពីម៉ូតូ ១គ្រឿង ដែលនៅខាងមុខ បណ្តាលឲ្យរេចង្កូតជ្រុលទៅបុកបង្គោលបេតុងស្លាកសញ្ញាប្រាប់ទិស ខូចខាតអស់ចំនួន៣ដើម ធ្វើឲ្យរថយន្តបានក្រឡាប់ផ្ងារជើង ប៉ុន្តែជាសំណាងល្អក្នុងហេតុការណ៍នេះពុំមានមនុស្សរងរបួសធ្ងន់ធ្ងរ ឡើយ។
ក្រោយពេលកើតហេតុ សមត្ថកិច្ចមូលដ្ឋានបានចុះទៅអន្តរាគមន៍ រហូតដល់វេលាម៉ោង៦ល្ងាច ថ្ងៃដដែល ទើបខាងក្រុមហ៊ុនបញ្ជូនរថយន្តស្ទូចមកស្ទូចរថយន្តក្រឡាប់បឈ្ឈរ ឡើងវិញ ហើយអូសយកទៅជួសជុលនៅក្រុងកំពង់ចាម និងបានចេញថ្លៃខូចខាតបង្គោលដើម្បីជាការបញ្ចប់រឿង៕
