ភ្នំពេញ: មន្ត្រីអង្គការសង្គមស៊ីវិល ដែលធ្វើការសង្កេតតាមមើលការបោះឆ្នោត បានអំពាវនាវដល់មេដឹកនាំគណបក្សនយោបាយទាំងពីរ ដែលមានអាសនៈនៅក្នុងសភា ត្រូវរកដំណោះស្រាយជាមួយគ្នាដោយសន្តិវិធី កុំយកប្រជាពលរដ្ឋ ធ្វើជាឧបករណ៍ល្បែងនយោបាយ។
លោក ហង្ស ពុទ្ធា ប្រធានអង្គការនិកហ្វិក
លោក ហង្ស ពុទ្ធា ប្រធានអង្គការនិកហ្វិក កាលពីថ្ងៃទី១៣ ខែសីហា
ឆ្នាំ២០១៣ បានមានប្រសាសន៍បញ្ជាក់យ៉ាងនេះថា
ក្រោយការបោះឆ្នោតកាលពីថ្ងៃទី២៨ ខែកក្កដាមកនោះ គណបក្សនយោបាយទាំងពីរ បានបង្ហាញនូវលទ្ធផលរៀងៗខ្លួន (គណបក្សប្រជាជនកម្ពុជា និងគណបក្សសង្គ្រោះជាតិ) ហើយការបង្ហាញតួលេខនោះ មានភាពមិនត្រូវរ៉ូវគ្នា ហើយគណបក្សនយោបាយទាំងពីរបានព្យាយាមជួបចរចាគ្នាចំនួន ២ លើក គឺជំនួបលើកទី១ នៅក្រោមឆ័ត្រ របស់គណៈកម្មាធិការជាតិរៀបចំការបោះឆ្នោត (គ.ជ.ប) តែមិនបានសំរេច ហើយជំនួបទី២ នៅក្រៅឆ័ត្ររបស គ.ជ.ប (៩សីហានៅវិមានរដ្ឋសភា) ប៉ុន្តែពុំទាន់បានលទ្ធផលជាផ្លែផ្កានៅឡើយទេ។
លោក ហង្ស ពុទ្ធា បានមានប្រសាសន៍បន្តថា អង្គការសង្គមស៊ីវិល ត្រូវបំពេញតួនាទីរបស់ខ្លួនឲ្យបានត្រឹមត្រូវទៅការកំណត់របស់ គ.ជ.ប គឺអង្គការសង្គមស៊ីវិលជាអ្នកសង្កេតការណ៍បោះឆ្នោត ប៉ុន្តែនៅពេលក្រោយការបោះឆ្នោតហើយ មានភាពមិនត្រូវរ៉ូវគ្នា រវាងគណបក្ស ដែលចូលរួមប្រកួតប្រជែង ដោយ គ.ជ.ប នោះគឺអង្គការសង្គមស៊ីវិលត្រូវចូលលរួម ដើម្បីស្វែងយល់ព័ត៌មាននោះ ពន្យល់ប្រជាពលរដ្ឋ ពីព្រោះអង្គការសង្គមស៊ីវិលចង់បង្ហាញតម្លាភាព ដោយប្រកាន់ភាពអព្យាក្រិត្យនៅក្នុងការបោះឆ្នោត។
លោក ហង្ស ពុទ្ធា បានមានប្រសាសន៍បន្តថា យោងតាមច្បាប់រយៈពេល ៧២ ម៉ោង ក្រោយពីការប្រកាសលទ្ធផលបឋមគណបក្សនយោបាយត្រូវដាក់ពាក្យបណ្តឹង តែមកដល់ពេលនេះគិតតាមនីតិវិធីផុតពេលដាក់ពាក្យបណ្តឹងតវ៉ាហើយ ប៉ុន្តែអ្វីគួរឲ្យចាប់អារម្មណ៍នោះ ស្ថាប័នពាក់ព័ន្ធត្រូវបង្ហាញនូវបញ្ហា ដែលខ្លួនបានរកឃើញផ្តល់ទៅ គ.ជ.ប ហើយ គ.ជ.ប ត្រូវដោះស្រាយបញ្ហាមិនប្រក្រតីទាំងនោះ ឲ្យបានអស់ ទោះបីមិនមានពាក្យបណ្តឹង ក៏ដោយត្រូវតែដោះស្រាយ ដើម្បីបញ្ចប់នូវភាពពុះកញ្ជ្រោលនៅក្នុងសង្គម។
លោក ហង្ស ពុទ្ធា បានមានប្រសាសន៍បន្តទៀតថា បប្រសិនបើមានការធ្វើបាតុកម្ម គឺរដ្ឋាភិបាលត្រូវប្រឈមបញ្ហា ២ ធំៗ គឺ.បញ្ហាទី១ រដ្ឋាភិបាលត្រូវរក្សាការពារបាតុកម្ម ដែលអហិង្សា បញ្ចេញមតិ សេរីភាព និងស្របច្បាប់។ បញ្ហាទី២ គឺរដ្ឋាភិបាលត្រូវធ្វើការតបតបង្ក្រាបបាតុកម្មហិង្សានោះ ដើម្បីការពារស្ថិរភាពសន្តិសុខសង្គម។
លោក ហង្ស ពុទ្ធា បានមានប្រសាសន៍ ដោយអំពាវនាវដល់មេដឹកនាំគណបក្សនយោបាយទាំងពីរ ត្រៀមមានអាសនៈ ក្នុងសភានីតិកាលទី៥ បន្តការជួបពិភាក្សាជាមួយគ្នាទៀត ដើម្បីស្វែងរកដំណោះស្រាយ ហើយកុំយកប្រជាពលរដ្ឋ ជាឧបករណ៍ល្បែងនយោបាយ ហើយការធ្វើបាតុកម្ម ត្រូវប្រកាន់ភ្ជាប់ក្រមសីលធម៌គោរពច្បាប់ ធ្វើបាតុកម្ម ដោយអហិង្សា កុំធ្វើជាបាតុករហិង្សា៕ – See more at: http://www.cen.com.kh/localnews/show_detail/19?token=MTZmOWEzZG#sthash.QBIbwSnz.dpuf
