សារ
ជាថ្មីម្តងទៀត លោកសម រង្ស៊ី
បានប្រកាសដោយចំហអំពីការធ្វើបាតុកម្មផ្លាស់ប្តូរមេ
ដឹកនាំប្រទេសកម្ពូជាបច្ចុប្បន្ន
ដែលលោកគ្រោងនឹងដឹកនាំធ្វើនៅក្រៅប្រទេស ។សេចក្តីអំពាវនាវនេះធ្វើឡើងនៅក្នុងជំនួបមួយជាមួយអ្នកគាំទ្រ ណបក្សសង្រ្គោះជាតិ នៅសហរដ្ឋអាមេរិក កាលពីថ្ងៃទី១៣ សីហានេះ ។
តាមប្រសាសន៍របស់លោកសម រង្ស៊ី បាតុកម្មធំៗពីរនឹងធ្វើឡើង នៅសហរដ្ឋអាមេរិក និងប្រទេសស្វ៊ីស ទីដែលស្នាក់ការអង្គការសហប្រជាជាតិតាំងនៅ ។ បាតុកម្មទី១ គ្រោងនឹងធ្វើនៅខាងមុខទីស្នាក់ការអង្គការសហប្រជាជាតិ នៅទីក្រុងញូវយ៉ក នាវេលាម៉ោង១.៣០ រសៀល ថ្ងៃទី១៩ ខែសីហា ឆ្នាំ២០១៣ ហើយបាតុកម្មទី២ គ្រោងនឹងធ្វើនៅខាងមុខស្នាក់ការអង្គការសហប្រជាជាតិ នៃទីក្រុងហ៊្សើណែវ ប្រទេសស្វ៊ីស នាថ្ងៃទី២៦ ខែសីហា ឆ្នាំ២០១៣ ។
ទោះជាមានការអំពាវនាវរបស់លោកសម រង្ស៊ីអំពីធ្វើបាតុកម្មដើម្បីផ្លាស់ប្តូររបបគ្រប់ប្រទេសបច្ចុ ប្បន្នក្តី ក៏គណបក្សសង្រ្គោះជាតិនៅទ្វីបអាមេរិកខាងជើង បង្ហាញអំពីគោលបំណងនៃបាតុកម្មនៅក្រៅប្រទេសនេះ គឺការស្នើអោយអង្គការសហប្រជាជាតិ ជួយជំរុញអោយរដ្ឋាភិបាលកម្ពុជា ធ្វើការពិនិត្យភាព មិនប្រក្រតីនៃការបោះឆ្នោត ដែលគណបក្សប្រឆាំងបានរកឃើញ និងទទូចអោយអង្គការសហប្រជាជាតិធ្វើជាអាជ្ញាកណ្តាលនៃការពិនិត្យ ភាព មិនប្រក្រតីនេះ ។
តាមប្រភពព័ត៌មានពីប្រទេសកម្ពុជា គណបក្សសង្រ្គោះជាតិ គ្រោងនឹងធ្វើបាតុកម្មប្រឆាំងលទ្ធផលបោះឆ្នោតនាថ្ងៃទី២០ ខែសីហា ឆ្នាំ២០១៣ ។
ទាក់ទងនិងការធ្វើបាតុកម្មតវ៉ានេះ លោកឧបនាយករដ្ឋមន្ត្រី ស ខេង បានសរសេរនៅក្នុងសេចក្តីប្រកាសមួយកាលពីថ្ងៃទី១២ សីហាថា ការធ្វើបាតុកម្មសំដែងមតិគឺជាសិទ្ធិសេរីភាពរបស់ ប្រជាពលរដ្ឋ និងគណបក្សនយោបាយ ប៉ុន្តែលោកបានទទូចអោយការប្រព្រឹត្តទៅនៃបាតុកម្មនោះ ប្រកបដោយសន្តិវិធី អហឹង្សា និងអនុលោមទៅតាមច្បាប់ ៕
