ដាក់បញ្ចូលពេល 23 August 2013, 15:45 AEST
សេចក្តីថ្លែងការណ៍ ចុះថ្ងៃទី២៣ ខែសីហា របស់គណបក្សសង្គ្រោះជាតិ បានចាត់ទុកការសំរេចឲ្យមានការបើកកញ្ចប់សុវត្ថិភាព «ក» មួយចំនួន ដើម្បីធ្វើការផ្ទៀងផ្ទាត់ និងដោះស្រាយនូវភាពមិនប្រក្រតីតាមបណ្តឹង របស់គណបក្សនយោបាយថាបានបង្ហាញពីតម្លាភាព និងការទទួលខុសត្រូវ ជាពិសេសនឹងធ្វើឲ្យម្ចាស់ឆ្នោតមានការជឿជាក់ ធ្វើឲ្យអ្នកឈ្នះដោយកិត្តិយស ឯអ្នកចាញ់ ក៏ចាញ់ដោយអស់ចិត្ត។
ជាមួយ គ្នានេះ គណបក្សសង្គ្រោះជាតិ ក៏បានស្នើដល់ក្រុមប្រឹក្សាធម្មនុញ្ញ ត្រូវចាត់វិធានការរៀបចំយន្តការ និងនីតិវិធីនៃការផ្ទៀងផ្ទាត់ ដោយឲ្យមានការចូលរួមពីភាគីដើមបណ្តឹង អ្នកអង្កេតការណ៍ជាតិ-អន្តរជាតិ ដើម្បីបង្ហាញពីតម្លាភាព និងការជឿទុកចិត្តពីគ្រប់ភាគី។
គណបក្សសង្គ្រោះជាតិ មានជំនឿថា ក្រុមប្រឹក្សាធម្មនុញ្ញនឹងពិនិត្យដោះស្រាយពាក្យបណ្តឹង តវ៉ាចំពោះលទ្ធផលបណ្តោះអាសន្ន របស់គណបក្សសង្គ្រោះជាតិ ដោយតម្លាភាព យុត្តិធម៌ និងការទទួលខុសត្រូវខ្ពស់។ ទន្ទឹមគ្នានេះដែរ លោក ទេព នីថា អគ្គលេខាធិការ គ.ជ.ប មានប្រសាសន៍ថា កន្លងមករាល់សកម្មភាពរបស់ គ.ជ.ប បានអនុវត្តតាមបទបញ្ជា និងនីតិវីធីបោះឆ្នោតបានត្រឹមត្រូវ៕
