(អត្ថបទចុះផ្សាយនៅថ្ងៃ 09-08-2013, 10:00 am) | ដោយ អ៊ឹង ចំរើន
ក្រុមការងារ ស្ត្រីដើម្បីទាំងអស់គ្នាដែលប្រមូលផ្តុំដោយក្រុមនិស្សិត សហគមន៍ និងអង្គការក្រៅរដ្ឋាភិបាលចំនួន២៥ បានសម្តែងនូវការខកចិត្តចំពោះការថយចុះនៃចំនួនស្ត្រីជាប់ឆ្នោតជា តំណាងរាស្ត្រ ពោលគឺមិនបានដល់៣០ភាគរយនៃគោលដៅរបស់ពួកគេបានរំពឹងនោះឡើយ។
យោងតាមលទ្ធផលក្រៅផ្លូវការដែលផ្សាយដោយអង្គការខុមហ្វ្រែលកាលពី ថ្ងៃទី២៩ ខែកក្កដា ក្រុមការងារស្ត្រីដើម្បីទាំងអស់គ្នា បានរកឃើញថា ស្ត្រីជាប់ឆ្នោតជាសមាជិកសភាអណត្តិទី៥នេះ មាន១៦រូបប៉ុណ្ណោះ ពោលគឺស្មើនឹង១៣ភាគរយ ដោយ៩រូបមកពីគណបក្សប្រជាជនកម្ពុជា និង៧រូបមកពីគណបក្សសង្គ្រោះជាតិ។
ប្រសិនបើលទ្ធផលផ្លូវការមិនសូវមានការខុសឆ្ងាយប៉ុន្មានពីរបាយការណ៍ របស់ខុមហ្វ្រែលទេនោះ តួលេខនេះបង្ហាញថា ចំនួនស្ត្រីជាប់ឆ្នោតមានការថយចុះ១,៦ភាគរយ ពោលគឺពី ១៤,៦៣ភាគរយនៅនីតិកាលទី៤ (ជាប់ឆ្នោតភ្លាម) មក១៣ភាគរយនិតីកាលទី៥ ។ នៅចុងអណត្តិទី៤ ចំនួនស្ត្រីជាសមាជិកសភាបានឡើង២១,១៣ភាគរយ។
ក្រុមបណ្តាញស្ត្រីបានលើកឡើងថា ចំនួនស្ត្រីដែលជាប់ឆ្នោតតែ១៣ភាគរយបែបនេះ បង្ហាញឲ្យឃើញថា កម្ពុជាមិនអាចសម្រេចតាមគោលដៅអភិវឌ្ឍសហស្សវត្សរ៍នៅចំណុចដៅទី ៣.៨ នៃគោលដៅទីបីដែលបានកំណត់ថា បង្កើនឲ្យមានតំណាងស្ត្រី៣០ភាគរយក្នុងស្ថាប័នរដ្ឋសភាត្រឹមឆ្នាំ២០១៥ ។
ដើម្បីឈានទៅសម្រេចគោលដៅអភិវឌ្ឍសហស្សវត្សរ៍កម្ពុជានោះ ក្រុមការងារស្ត្រីដើម្បីទាំងអស់គ្នា បានផ្តល់យោបល់ដល់រដ្ឋាភិបាល និងគណបក្សជាប់ឆ្នោតលើការដាក់បញ្ចូលបេក្ខជនស្ត្រីដែលមានលេខរៀង ខាងក្រោម ឬបម្រុងឲ្យបានជាប់តំណាងរាស្ត្រពេញសិទ្ធិ នៅពេលដែលអ្នកមានលេខរៀងជួរមុខទៅកាន់តំណែងក្នុងរដ្ឋាភិបាល ឬលាលែងពីតំណែង។
បន្ថែមពីលើនោះ រដ្ឋាភិបាលអណត្តិថ្មី ក៏ត្រូវបានផ្តល់យោបល់ផងដែរចំពោះការបង្កើនចំនួនស្ត្រីជា ថ្នាក់ដឹកនាំ និងតួនាទីធ្វើសេចក្តីសម្រេចនៅក្នុងក្រសួង ស្ថាប័ននីមួយៗដោយគិតចាប់តាំងពីតួនាទីអនុរដ្ឋលេខាធិការ រហូតដល់ឧបនាយករដ្ឋមន្ត្រីឲ្យបានយ៉ាង៣០ភាគរយដើម្បីឆ្លើយតបទៅតាម កំណែទម្រង់រដ្ឋបាលរដ្ឋលេខាធិការដ្ឋានមុខងារសាធារណៈ និងគោលដៅអភិវឌ្ឍន៍សហស្សវត្សរ៍កម្ពុជា៕
