ខេត្តពោធិសាត់៖ នគរបាលបង្ក្រាបទីតាំងប្រើប្រាស់គ្រឿងញៀន មួយកន្លែង ត្រង់ចំណុចផ្ទះជួល របស់ឈ្មោះ អ៊ុន ថា ភេទ
ស្រី ស្ថិតក្នុងភូមិពាលញែក២សង្កាត់ផ្ទះព្រៃ ក្រុងពោធិសាត់ ខេត្តពោធិសាត់ ចាប់ពីម៉ោង ១៤និង៤០នាទី រហូតដល់ម៉ោង ១៥និង៤០នាទី ថ្ងៃទី១៩ ម្សិលមិញនេះ ។
លោកវរសេនីយ៍ត្រី ស៊ី សាវិន នាយការិយាល័យបង្ក្រាប គ្រឿងញៀន នៃស្នងការដ្ឋាននគរបាលខេត្តពោធិសាត់ បានឲ្យដឹងថា ការបង្រាបទីតាំងប្រើប្រាស់គ្រឿងញៀន មួយកន្លែងនេះ គឺធ្វើឡើងតាមបញ្ជា របស់លោក ប៉ង់ ច័ន្ទសុយុទ្ធារា ព្រះរាជអាជ្ញារងសាលាដំបូងខេត្តពោធិសាត់ ។ ក្នុងពេលធ្វើការបង្ក្រាប សមត្ថកិច្ចនគរបាលឃាត់ខ្លួនមុខសញ្ញាសេពគ្រឿងញៀន បាន ៤នាក់ និងថង់វេចខ្ចប់ព្រមទាំងសម្ភារសម្រាប់មុខសញ្ញាជក់ មួយចំនួនទៀតផង ។
ប្រភពព័ត៌មានដដែល បានឲ្យដឹងទៀតថា មុខសញ្ញាដែលសមត្ថកិច្ចឃាត់ខ្លួន ទី១. ឈ្មោះ អ៊ុង បញ្ញា ភេទប្រុស អាយុ២៧ឆ្នាំ មានទីលំនៅភូមិក្បាលហុង សង្កាត់បន្ទាយដី ទី២. ឈ្មោះ ហេង សំណាង ភេទប្រុស អាយុ៣១ឆ្នាំ មានទីលំនៅភូមិចំការចេកខាងត្បូង សង្កាត់ផ្ទះព្រៃទី៣ ឈ្មោះ សំ វណ្ណៈ ភេទប្រុស អាយុ២៣ឆ្នាំ មានទីលំនៅភូមិពាលញែក២ សង្កាត់ផ្ទះព្រៃ អ្នកទាំងបីនៅក្រុងពោធិសាត់ ខេត្តពោធិសាត់ និងទី៤. ឈ្មោះ ទុំ សំរិទ្ធ ភេទប្រុស អាយុ២៧ឆ្នាំ រស់នៅភូមិបឹងយា ឃុំវាល ស្រុកកណ្តៀង ខេត្តពោធិសាត់ ។
លោកវរសេនីយ៍ត្រី ស៊ី សាវិន បន្តថា ក្រោយពេលធ្វើការបង្ក្រាប សត្ថកិច្ចនគរបាល បញ្ជូនមុខសញ្ញាប្រើប្រាស់មកការិយាល័យបង្ក្រាបគ្រឿងញៀនខេត្ត ដើម្បីកសាងសំណុំរឿង ចាត់ការ តាមនីតិវិធីច្បាប់ ៕
