Written by បុរសស៊ីវិល័យ // March 18, 2013 // កម្សាន្ត - កីឡា & សុខភាព, សុខភាពសំរស់&ភេទ // No comments
គ្មាននរណាម្នាក់ចូលចិត្តកើតមុនលើផ្ទៃមុខទេ ប៉ុន្តែវាកាន់តែអាក្រក់ជាងហ្នឹងទៅទៀត បើអ្នកកើតមុននៅលើដងខ្លួនរបស់អ្នក។ អ្វីដែលគួរឲ្យខកចិត្តទៀតនោះ គឺគ្មានឱសថណាព្យាបាលមុន ជាសះដាច់ជាទូទៅនោះទេ។ ទោះជាយ៉ាងណាក៏ដោយ ក៏កុំប្រញាប់ពិបាកចិត្តនោះដែរ ព្រោះថា ការខិតខំប្រចាំថ្ងៃ និងការចំណាយពេលបន្តិចបន្តួយរាល់ថ្ងៃ នោះអ្នកនិងអាចកាត់បន្ថយ អាការកើតមុនលើ
ដងខ្លួនបានច្រើន គួរសមដែរ។
គន្លឹះនៃការកាត់បន្ថយការកើតមុនលើដងខ្លួន ៖
ជំហានដំបូង : អ្នកត្រូវលាងសំអាតខ្លួន និងស្បែករបស់អ្នក ឲ្យបានស្អាតជាប្រចាំ។ ដំបូងអ្នកត្រូវជ្រើសរើស ប្រភេទសាប៊ូដុសខ្លួន ដែលប្រឆាំងនឹងបាក់តេរីខ្ពស់។ សាប៊ូដុសខ្លួនដែលមានផ្ទុកជាតិ អាស៊ីដ glycolic និងជួយកាត់បន្ថយការកើតមុន។ ប្រសិនបើអ្នកមានការឈឺចាប់ ដោយសារតែមុនលើដងខ្លួនរបស់អ្នកនោះ អ្នកគួរជៀសវាងការប្រើប្រាស់ផលិតផលទឹកអប់ដែលខ្លាំងៗ។
វាជារឿងសំខាន់ម្យ៉ាងដែរចំពោះ ការស្លៀកសំលៀកបំពាក់ផលិតពីសាច់ក្រណាត់ ដែលអាចឲ្យខ្យល់ធម្មជាតិចេញចូលបាន។ វាធ្វើឲ្យស្បែករបស់អ្នក អាចដកដង្ហើមបាន និងជួយការពារកុំឲ្យបែកញើស បានថែមទៀតផង។ ងូតទឹកបន្ទាប់ ពីអ្នកហាត់ប្រាណរួច វាជាចំណុចសំខាន់ ក្នុងការបង្ការការកើតមុនលើដងខ្លួន ពិតប្រាកដណាស់ជាធម្មតា ការលេចចេញកន្ទួលក្រហម ឬមុន គឺព្រោះតែការបែកញើសហួសប្រមាណ។
គន្លឹះមួយទៀត សំរាប់កាត់បន្ថយការកើតមុនលើដងខ្លួននោះ គឺត្រូវជ្រើសរើសយកក្រែមណា ដែលមានផ្ទុកសារធាតុ benzoyl peroxide ឬក៏ទៅកម្ម៉ង់ស្ប្រៃបាញ់ខ្លួន ពិសេសផ្ទាល់ខ្លួនរបស់អ្នក ក៏បានដែរ។ ក្រៅពីនេះទៀត អ្នកអាចប្រើប្រាស់ឱសថ ដែលធ្វើនៅផ្ទះខ្លួនឯង ក៏បានដែរ ដោយគ្រាន់តែលាយប្រេងអូលីវចំនួន ១/5 មីល្លីមីត្រ ជាមួយនឹងចំនួនដូចគ្នានៃប្រេង កូឡេនដូលឡា (Calendula) និងប្រេង អាល់ម៉ុន (Almond) រួចហើយបន្ថែមប្រេង ដើមតែ (Tea tree) ចំនួន២ដំណក់ និងប្រេង ឆាមម៉ូម៉ាយ (Chamomile) ចំនួន១ដំណក់ លាយច្របល់បញ្ចូលគ្នាដោយប្រុងប្រយ័ត្ន ហើយលាបវាឲ្យសព្វលើកន្លែងដែលកើតមុននោះ ជារៀងរាល់ថ្ងៃ។
ជម្រុះស្បែកចាស់ជារៀងរាល់ថ្ងៃ វាអាចជួយកាត់បន្ថយ ការកើតមុនលើដងខ្លួនរបស់អ្នកបាន។ ជម្រុះចោលនូវកោសិកាដែលងាប់ៗចោល ដោយដុះលាងខ្លួនជាមួយទឹកក្តៅ ឧណ្ហៗ។ វាជួយបណ្តុះស្បែកថ្មី ជួយការពារ និងភ្ចិតរន្ធញើស តែអ្នកត្រូវប្រាកដថា ទឹកក្តៅនោះមិនធ្វើឲ្យអ្នករលាកឡើយ ហើយចូរអ្នកកុំភ្លេច ផ្តល់សំណើមដល់ស្បែករបស់អ្នករាល់ពេលដែលជម្រុះ កោសិកាស្បែកចាស់ អស់ទាំងនោះ។
បន្ថែមពីនេះទៀត ការព្យាបាលមុន ក៏ទាមទារឲ្យអ្នកបរិភោគអាហារ ឲ្យមានតុល្យភាព ផងដែរ។ អ្នកត្រូវតែមានផែនការបរិភោគអាហារ ដែលមានសារធាតុចិញ្ចឹមសរីរាង្គ ដូចជា សារធាតុប្រឆាំងប្រតិកម្ម អុកស៊ីដ antioxidants ដែលជាសារធាតុម្យ៉ាង ដែលជួយប្រឆាំងជំងឺមហារីក។ Omega-3 គឺជាអាស៊ីដម្យ៉ាង ដែលរាងកាយត្រូវការចាំបាច់ ដើម្បីលូតលាស់ និងមានសុខភាពល្អ ជាពិសេសជាងនេះទៅទៀតនោះ អ្នកត្រូវពិសារទឹកឲ្យបានច្រើន តាមដែលអាចធ្វើបាន៕
ប្រែសម្រួល៖ អូនសុនីតា.
