ទន្ទឹម
នឹងការរីកចម្រើនរបស់បណ្ដាក្រុមហ៊ុនទូរសព្ទនានា
ដែលកំពុងប្រជែងគ្នាយ៉ាងស៊ីសាច់ហុតឈាមដើម្បីដណ្ដើមចំណែកទីផ្សារ
និងប្រជាប្រិយភាពរបស់ខ្លួនបច្ចុប្បន្ននេះក្នុងនោះ Smartphone ស៊េរីទំនើបៗតម្លៃរាប់រយដុល្លារ ខ្លះលោតដល់ពាន់ដុល្លារ ជាច្រើន បំពាក់បច្ចេកវិទ្យាផ្ទេរទិន្នន័យឥតខ្សែ NFC (Near Field Communication)។ ទោះបីជាដឹង ស្គាល់ ឬមានកាន់នៅហ្នឹងដៃក៏ដោយ ក៏វិសាលភាពនៃការប្រើប្រាស់បច្ចេកវិទ្យាផ្ទេរទិន្នន័យដែលទំនើបជាង ប្លូធូសមួយនេះ ហាក់នៅមានកម្រិតនៅឡើយ។
ស្វែងយល់ពីរបៀបផ្ទេរទិន្នន័យដោយប្រើNFC ដូចខាងក្រោម៖ NFC ជាបច្ចេកវិទ្យាផ្ទេរទិន្នន័យឥតខ្សែមានលើSmartphone ដែលមានតិចណូឡូជីនេះដូចគ្នា ដោយមានលក្ខណៈពិសេស ដោយគ្រាន់តែយកទូរសព្ទទៅប៉ះគ្នា (ទល់ខ្នង) គ្នាប៉ុណ្ណោះ។ ស្វែងយល់លំអិតពីNFC ចុចត្រង់នេះ
សង្វាត បុគ្គលិកក្រុមហ៊ុនផ្គត់ផ្គង់សេវា ទូរសព្ទក្នុងស្រុកមួយលើកឡើងថា គេមិនបានស្គាល់ អ្វីទៅជា NFC ទេ ហើយក៏មិនធ្លាប់ប្រើដែរ ព្រោះបច្ចុប្បន្នគេកំពុងប្រើSmartphone តម្លៃថ្លៃក៏ពិតមែន ប៉ុន្តែទូរសព្ទនោះមិនមានមុខងារនេះទេ។ “…តែក្នុងនាមជាអ្នកតាមដានបច្ចេកវិទ្យា ខ្ញុំនឹងព្យាយាមស្វែងយល់បច្ចេកវិទ្យាមួយនេះ”។
ងាកមកជួបជាមួយអ្នកជំនាញអាយធី និងមានបទពិសោធន៍ប្រើNFC ដោយសរសើរថាល្អ និងឡូយមិនដាច់ពីមាត់ លោក សុវណ្ណវិចិត្រឯណេះវិញនិយាយថា “ធ្លាប់ប្រើហើយ…NFC ហ្នឹងបញ្ជូនរូបភាពអីលឿនណាស់ តែអត់សូវមានទូរសព្ទមានមុខងារហ្នឹង”។
ថ្វីត្បិតតែធ្លាប់មានSmartphone មានមុខងារNFC ប្រើ លោក ឃុត សុឃឿន អ្នកគ្រប់គ្រងកម្មវិធីវិទ្យុ អេហ្វអឹម ១០២ បានលើកឡើងថា NFC មិនសំខាន់ទេសម្រាប់តម្រូវការរបស់លោក ដោយសង្កត់ធ្ងន់ថា មានតែអ៊ីនធឺណិតគឺគ្រប់គ្រាន់ហើយ។ ម្យ៉ាងលោក ក៏មិនធ្លាប់បានសាកល្បងប្រើប្រាស់បច្ចេកវិទ្យាមួយនេះដែរ។
“បច្ចេកវិទ្យាមួយនេះ នៅហាក់កម្រិតនៅឡើយនៅកម្ពុជាយើង”។ នេះជាបញ្ជាក់របស់លោក អ៊ី សុគន្ធ ប្រធានផ្នែកទំនាក់ទំនងរបស់ណូគា ប្រចាំកម្ពុជា ឡាវ។ លោកបកស្រាយបន្តថា នៅមានកម្រិតគឺ ទីមួយ NFC ជាបច្ចេកវិទ្យាថ្មីទើបនឹងលេចចេញជារូបរាង ដូច្នេះមិនប្រាកដថា អ្នកប្រើប្រាស់Smartphone ទាំងអស់យល់ដឹងទូលំទូលាយនោះទេ។ ទីពីរ NFC មានតែលើSmartphone ទំនើបៗតែប៉ុន្មានម៉ូដែលប៉ុណ្ណោះ ហើយតម្លៃទៀតសោតក៏អ្នកប្រើប្រាស់ទូទៅមានលទ្ធភាពទិញមកប្រើនោះ ដែរ។
យ៉ាងណាមិញ លោកក៏បានលើសរសើរថា តិចណូឡូជីមួយនេះ មានប្រសិទ្ធភាពណាស់ (លឿន) ក្នុងការបញ្ជូនទិន្នន័យ ជាពិសេសរូបភាព ហើយលោកក៏សង្ឃឹមយ៉ាងមុតមាំថា យុវវ័យទាំងអស់គួរស្វែងយល់អ្វីដែលថ្មី ដើម្បីទទួលគុណប្រយោជន៍ពីការវិវត្តន៍នៃឧស្សាហកម្មបច្ចេកវិទ្យា។ ល្បឿននៃការបញ្ជូនទិន្នន័យ គឺអាស្រ័យទៅតាមទំហំឯកសារ។
Near Field Communication (NFC) សព្វថ្ងៃនេះមានលើបណ្ដាទូរសព្ទឆ្លាតវៃមួយចំនួនដូចជា Lumia 620, 720, 820, 920, HTC One, Xperia Z, Galaxy Note II, Galaxy S3, S4, BlackBerry Z10 និង សែស្រឡាយOptimus G របស់LG ប៉ុន្មានម៉ូដែលទៀត។ ផ្ទុយទៅវិញ បច្ចេកវិទ្យាមួយនេះ មិនមានលើផលិតផលApple ទេ គិតត្រឹមiPhone 5។
បន្តអានអត្ថបទ៖ ករណីផ្ទុះទូរសព្ទ ទទួលការចាប់អារម្មណ៍ខ្លាំងពីពលរដ្ឋកម្ពុជា
ចុះមិត្តយុវវ័យវិញមានការយល់ឃើញបែបណាចំពោះបច្ចេកវិទ្យា NFC?
