កម្ពុជា -
អត្ថបទចុះផ្សាយនៅថ្ងៃ អង្គារ 03 កញ្ញា 2013 -
ព័ត៌មានទើបកែប្រើលើកចុងក្រោយ ថ្ងៃ អង្គារ 03 កញ្ញា
កងរាជអាវុធហត្ថ កំពុងហ្វឹកហាត់ នៅពហុកីឡដ្ឋានជាតិ ក្នុងទីក្រុងភ្នំពេញ
RFI/ Siv Chana
កម្លាំងកងរាជអាវុធហត្ថក្នុងរាជធានីភ្នំពេញជាច្រើនត្រូវបានគេដឹកចល័តនៅថ្ងៃអង្គារ នេះឆ្ពោះទៅកាន់គោលដៅផ្សេងៗគ្នា។ ការហ្វឹកហាត់ក៏ត្រូវបានគេរៀបចំធ្វើឡើងនៅឯពហុកីឡដ្ឋានជាតិអូឡាំពិក។ លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេសបានប្រាប់វិទ្យុបារាំងអន្តរជាតិថា កងកម្លាំងរាជអាវុធហត្ថរាជធានីប្រមាណជា ១៥០០
នាក់ត្រូវបានចល័តទៅកាន់គោលដៅដើម្បីត្រៀមការពារសន្តិសុខ និងទប់ទល់បាតុកម្ម។
បើយោងតាមលោក ខេង ទីតូ កងកម្លាំងទាំងនោះដែលមកពីអង្គភាពផ្សេងៗគ្នាចាំបាច់ត្រូវហ្វឹក ហាត់អំពីក្បួនយុទ្ធសាស្ត្រឲ្យស៊ីសង្វាក់គ្នាក្នុងការត្រៀមទប់ ទល់ក្នុងករណីដែលមានអំពើហិង្សាកើតឡើង។ ការចល័តកងកម្លាំង និងការហ្វឹកហាត់ក្បួនយុទ្ធសាស្ត្រក៏ត្រូវបានបើកធ្វើដូចគ្នា ដែរនៅតាមបណ្តាខេត្តនានា។ លើសពីនេះ ការហ្វឹកហាត់បាញ់គ្រាប់ពិតក៏ត្រូវគេគ្រោងបើកធ្វើនៅថ្ងៃទី ៥កញ្ញាខាងមុខនេះដែរ នៅឯភ្នំជំរាល ក្នុងខេត្តកំពង់ឆ្នាំង។
នេះបើយោងតាមប្រភពពីអ្នកនាំពាក្យកងរាជអាវុធហត្ថលើផ្ទៃប្រទេសដដែល។
កាលពីថ្ងៃអាទិត្យកន្លងទៅ កម្លាំងនគរបាលមកពីគ្រប់ខណ្ឌក្នុងរាជធានីភ្នំពេញប្រមាណជាង ២០០០ នាក់ក៏ត្រូវបានប្រមូលផ្តុំនៅឯកោះពេជ្រដើម្បីហ្វឹកហាត់ក្បួនយុទ្ធសាស្ត្រ ទប់ទល់ជាមួយបាតុកម្មដូចគ្នានេះដែរ។ ការចល័តកងកម្លាំងប្រដាប់អាវុធ និងការហ្វឹកហាត់មានសកម្មភាព កាន់តែខ្លាំងឡើងបន្ទាប់ពីគណបក្សសង្គ្រោះជាតិប្រកាស ធ្វើបាតុកម្មអហិង្សានៅថ្ងៃទី ៧កញ្ញាខាងមុខនេះដើម្បីប្រឆាំងលទ្ធផលបោះឆ្នោត។
គណបក្សប្រឆាំងក៏បានហ្វឹកហាត់ដល់ក្រុមបាតុកររបស់ខ្លួនអំពីយុទ្ធវិធី ធ្វើបាតុកម្មអហិង្សា និងអំពីវិធីការពារខ្លួនពេលមានការបង្ក្រាបថែមទៀត។
ទោះបីជាគណបក្សប្រឆាំងបានប្រកាសពីមហាបាតុកម្មអហិង្សា ឬក៏ជាពិធីបួងសួងដើម្បីសុំសន្តិភាពយ៉ាងណាក៏ដោយ ក៏ក្នុងក្រសែភ្នែករបស់អាជ្ញាធរគណបក្សកាន់អំណាច បាតុកម្មនេះទំនងជាមានគោលដៅវែងឆ្ងាយជាងនេះ។ អ៊ីចឹងហើយបានជាពួកគេប្រយ័ត្នប្រយែងយ៉ាងខ្លាំង ចំពោះមហាបាតុកម្មរបស់គណបក្សប្រឆាំង៕
